ەلسيار قاناعاتوۆ: كانۆون وليمپياداسىنىڭ جۇلدەگەرلەرى مەملەكەتتىك سىياقىدان قۇر قالمايدى
كانۆون. KAZINFORM - وڭتۇستىك كورەيانىڭ كانۆون قالاسىندا ءوتىپ جاتقان IV قىسقى جاس وسپىرىمدەر وليمپياداسى دا بەل ورتاسىنا جاقىنداپ قالدى. بۇگىنگە دەيىن قازاقستان قۇراماسى 1 التىن، 1 قولا مەدال الىپ ۇلگەردى.
وسى ورايدا KAZINFORM تىلشىسىنە وڭتۇستىك كورەيادان كانۆون-2024 ميسسياسىنىڭ جەتەكشىسى، قازاقستان ۇ و ك سپورت دەپارتامەنتىنىڭ باسشىسى ەلسيار قاناعاتوۆ ارنايى ەكسكليۋزيۆ سۇحبات بەرىپ، قىسقى سپورت توڭىرەگىندەگى ماسەلەردى، جاس ءوسپىرىم وليمپياداسىنىڭ جەڭىمپازدارى مەن جۇلدەگەرلەرىنە بەرىلەتىن سىياقىلار، وليمپيادالىق شتاپتىڭ اتقارىپ جاتقان مىندەتتەرى تۋرالى بايانداپ بەردى.
- ەلسيار بايمۇحامەت ۇلى، كانۆون وليمپياداسى قالاي ءوتىپ جاتىر؟
- وڭتۇستىك كورەيانىڭ كانۆون قالاسىندا ءوتىپ جاتقان IV قىسقى جاس وسپىرىمدەر وليمپياداسى وتە جوعارى دەڭگەيدە ءوتىپ جاتىر دەپ ايتۋعا بولادى. وسى ۇلكەن كەشەندى جارىسقا 78 مەملەكەتتەن ويىنشىلار كەلگەن. قازاقستان وسى وليمپيادا ويىندارىنا 41 سپورتشىسىن ۇكىلەپ بايگەگە قوسىپ جاتقان جايى بار. قازىرگە دەيىن قورجىنىمىزدا 1 التىن، 1 قولا مەدال بار. سونىمەن بىرگە سپورتشىلارىمىز اراسىنان 5، 6، 7، 10-ورىنداردان كورىنىپ جاتقان ويىنشىلارىمىز دا بار. مەنىڭ ويىمشا بۇل دا جامان كورسەتكىش ەمەس.
ءبىزدىڭ شتاپ ءوز تاراپىنان سپورتشىلارعا دا، جاتتىقتىرۋشىلارعا دا بارلىق جاعداي جاساپ جاتىر. كۇندەلىكتى سپورتشىلارىمىزدىڭ جاعدايىن قاداعالاپ، دارىگەرلىك كومەك، ۋاقىتىلى تاماقتانۋ، جارىستارعا كەدەرگىسىز ءوز ۋاقىتىندا بارىپ قاتىستىرۋ، جارىستاردان كەيىن كەشىكتىرمەي جاتاقحانالارعا الىپ قايتۋ، ۋاقىتىندا دەمالدىرۋ، بارلىعى ءبىزدىڭ ءجىتى قاداعالاۋىمىزدا.
سونداي-اق ءار كۇنى جارىس اياقتالعاننان كەيىن جاتتىقتىرۋشىلارمەن سول كۇنگى جارىستاردى تالقىلاپ، تارازىلاپ، قاي جەردەن قانداي ولقىلىقتار بولعانىن كەڭەسىپ، كەلەسى كۇنگە جوسپار قۇرامىز. ەگەر ءبىر ولقىلىق بولعان جاعدايدا سونىڭ ورىنىن تولتىرۋعا كۇش سالامىز.
بۇل جاس وسپىرىمدەر وليمپياداسى بولعاندىقتان تەك جارىستار عانا ەمەس، باسقا دا كوپتەگەن مادەني ءىس-شارا بولىپ جاتىر. ءبىز بۇل جاعىن دا قالىس قالدىرماي، سونداي شارالارعا جاستارىمىزدى قاتىستىرىپ، ءار ەلدەن كەلگەن بالالار اراسىندا ءوزارا تاجىريبە الماسىپ، ءبىر-بىرىمەن جاقسى قارىم-قاتىناس، تۇسىنىستىك ورناتۋعا كۇش-جىگەرىمىزدى سالامىز.
- جارىستاردىڭ ادىلدىگىنە سپورت مامانى رەتىندە قانداي باعا بەرەسىز؟
- وليمپيادا ويىندارى وتە جوعارى دەڭگەيدە ءوتىپ جاتىر. تورەشىلەردىڭ ادىلدىگىنە ەشقانداي كۇمانىمىز جوق. قازىرگە دەيىن سپورتشىلارىمىزدىڭ اراسىنان دا، جاتتىقتىرۋشىلار اراسىنان دا تورەشىلەرگە ەشقانداي شاعىم بولعان ەمەس. سوندىقتان دودا ءادىل ءوتىپ جاتىر دەپ سەنىممەن ايتۋعا بولادى.
- قازىر قورجىنىمىزدا 1 التىن، 1 قولا مەدال بار. تاعى قانداي سپورت تۇرلەرىنەن مەدال بولىپ قالۋى مۇمكىن؟
- بۇل جاس وسپىرىمدەر وليمپياداسى اياقتالۋعا ءالى اپتادان استام ۋاقىت بار. الدا وزگە دە سپورتشىلارىمىز باق سىنايتىن جارىستار كۇتىپ تۇر. سوندىقتان ءبىزدىڭ سپورتشىلار ءالى دە جۇلدەگە تالاسا الادى دەگەن سەنىمدەمىز. مىسالى، حوككەي، شورت-ترەك، فريستايل-موگۋلدان جاقسى ناتيجە كۇتەمىز.
- كانۆونداعى جاستارىمىزدىڭ قازىرگى جەتىستىكتەرىنە قاراپ، «بولاشاق چەمپيوندار تاربيەلەپ جاتىرمىز» دەپ سەنىممەن ايتا الامىز با؟
- ازىرگە قورجىنىمىزعا تۇسكەن 1 التىن، 1 قولا جۇلدەگە قاراپ، ەلىمىزدىڭ بارلىق وبلىسىندا قىسقى سپورت ءتۇرى كەرەمەت دامىپ كەتتى دەپ ايتۋعا بولماس. بىزدە اسىرەسە شالعاي مەكەندەردە، اۋداندىق، اۋىلدىق جەرلەردى بىلاي قويعاندا كەيبىر وبلىس ورتالىقتارىنىڭ وزىندە قىسقى سپورت مەكتەپتەرىنىڭ سانى وتە از. بالالاردى جاتتىقتىراتىن جاتتىقتىرۋشىلاردىڭ جالاقىسى دا تومەن. قازىر تۋريزم جانە سپورت مينيسترلىگى بۇل ماسەلەلەردى شەشۋ جولدارىن قاراستىرىپ جاتىر.
مەنىڭ ويىمشا، ەلىمىزدە قىسقى سپورتتى جاقسى دامىتۋعا بارلىق مۇمكىندىكتەر بار. ءبىز، وزدەرىڭىز بىلەسىزدەر 2011-جىلى الماتى، استانا قالالارىندا قىسقى ازيادا ويىندارىن، ودان كەيىن دۇنيەجۇزىلىك قىسقى ۋنيۆەرسيادانى جوعارى دەڭگەيدە ۇيىمداستىرا بىلدىك. وسى جارىستاردى قابىلداۋ اياسىندا الماتى مەن استانا قالالارىندا كوپتەگەن قىسقى سپورت الاڭدارى، جاتتىعۋ ورتالىقتارى سالىندى. ال وزگە وڭىرلەردە ونداي ورتالىقتار كەمشىل بولىپ وتىر. اسىرەسە، قىسقى سپورت تۇرلەرىن دامىتاتىن مەكتەپتەر ماڭىندا سونداي ورتالىقتار بولۋى كەرەك. ءار وبلىستا دايىندالاتىن ورتالىقتار بولسا، ءبىزدىڭ بۇقارالىق سپورت تا، قىسقى سپورت تا قازىرگىدەن دە جاقسى دامىعان بولار ەدى. ءالى دە كەش ەمەس، الداعى ۋاقىتتا بۇ ماسەلەنىڭ بارلىعى شەشىمىن تابادى دەگەن ۇمىتتەمىز.
- ەلىمىزدە جاس وسپىرىمدەر وليمپياداسىنىڭ جەڭىمپازدارى مەن جۇلدەگەرلەرىنە قانداي سىياقى تاعايىندالعان؟
- ەلىمىزدە كەز-كەلگەن الەمدىك دودالاردا توپ جارعان سپورتشىلارعا ناقتىلى بەلگىلەنگەن قارجىلاي سىياقى بار. جاس وسپىرىمدەر اراسىنداعى وليمپيادا ويىندارىنىڭ جەڭىمپازدارى مەن جۇلدەگەرلەرى دە مەملەكەتتىك سىياقىدان قۇر قالمايدى.
اتاپ ايتسام، چەمپيون بولعان سپورتشىعا 10 مىڭ ا ق ش دوللارى، باپكەرىنە 5 مىڭ ا ق ش دوللارى، ەكىنشى ورىن العان جۇلدەگەرگە 5 مىڭ، باپكەرىنە 3 مىڭ ا ق ش دوللارى بەرىلەدى. ال ۇزدىك ۇشتىكتەن كورىنگەن سپورتشىلارىمىز 3 مىڭ ا ق ش دوللارىن يەلەنسە، باپكەرىنە 2 مىڭ دوللار بەرىلەدى.
سونىمەن قاتار جەڭىمپاز سپورتشىلارعا ءاربىر فەدەراتسيالار، ءاربىر جەرگىلىكتى اكىمدىكتەر وزدەرى شەشىم قابىلداپ، ءارتۇرلى باعىتتا، ماراپاتتاۋعا رۇحسات ەتىلگەن. سوندىقتان، جەڭىمپاز اتانىپ، ەلىمىزدى، ءوز تۋعان اۋىلىمىزدى، ءوڭىرىمىزدى قۋانتىپ جاتسا، ەشكىم سول سپورتشىنى جەرگە قاراتپايتىنى انىق. بىزدە جەتىستىككە جەتكەن سپورتشىلاردى ماراپاتتاۋ جاقسى ءداستۇرى بار.
- اڭگىمەڭىزگە راحمەت!
اۆتوركۇنسۇلتان وتارباي
