ۇلەستىك قۇرىلىس، ينۆاتاكسي جانە جول ساپاسى: جاڭا زاڭعا تۇزەتۋلەر ەنگىزىلدى
استانا. KAZINFORM - مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇرعىن ءۇي قۇرىلىسىنا ۇلەستىك قاتىسۋ، اۆتوموبيل جولدارى جانە مۇگەدەكتىگى بار ادامداردى تاسىمالداۋ جونىندەگى قىزمەتتەردى كورسەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى.
زاڭ ازاماتتىق، قىلمىستىق، قىلمىستىق-پروتسەستىك، ازاماتتىق پروتسەستىك جانە الەۋمەتتىك كودەكستەرگە، سونداي-اق 14 زاڭعا تۇزەتۋلەر ەنگىزدى.
تۇزەتۋلەردىڭ ءبىرىنشى بلوگى ۇلەستىك قۇرىلىس پروتسەستەرىنىڭ زاڭدىلىعى مەن اشىقتىعىن قامتاماسىز ەتۋگە، ۇلەسكەرلەردىڭ قۇقىقتارى مەن زاڭدى مۇددەلەرىن قورعاۋعا باعىتتالعان.
تۇزەتۋلەردىڭ ەكىنشى بلوگىندا ينۆاتاكسي پيلوتتىق جوباسىن جاپپاي قولدانىسقا ەنگىزۋ كوزدەلگەن.
الەۋمەتتىك قىزمەتتەر پورتالىندا قولجەتىمدى قىزمەتتەر ساناتىنا مۇگەدەك جانداردى ينۆاتاكسيمەن تاسىمالداۋ قىزمەتى ەنگىزىلدى. ياعني مۇگەدەكتىگى بار ادامدار وزدەرىنىڭ ەرەكشە قاجەتتىلىگىنە بايلانىستى كولىك شاقىرۋعا مۇمكىندىك الدى. وسىلايشا ولاردىڭ ەركىن ءجۇرىپ-تۇرۋى قامتاماسىز ەتىلەدى.
تۇزەتۋلەردىڭ ءۇشىنشى بلوگى اۆتوموبيل جولدارىنىڭ ساپاسىن ارتتىرۋعا باعىتتالعان.
جول سالاسىن تسيفرلاندىرۋ ماقساتىندا «اۆتوموبيل جولدارى تۋرالى» زاڭدا جول قۇرىلىسى ماتەريالدارى مەن جاڭا تەحنولوگيالاردىڭ ءبىرىڭعاي بازاسىن جاساقتاۋعا قۇقىقتىق نەگىز پايدا بولدى.
سونىمەن قاتار مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قارجى نارىعىن دامىتۋ، قارجىلىق كورسەتىلەتىن قىزمەتتەردى تۇتىنۋشىلاردىڭ قۇقىقتارىن قورعاۋ، بايلانىس جانە ارتىق زاڭنامالىق رەگلامەنتتەۋدى بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى.
زاڭنىڭ ءماتىنى باسپا سوزدە جاريالانادى.
ايتا كەتەلىك بۇگىن مەملەكەت باسشىسى «قازاقستان رەسپۋبليكاسىنىڭ اۋماقتىق قورعانىسى تۋرالى» زاڭىنا قول قويعان ەدى.
