ۇلەسكەرلەردى قورعاۋ: ۇلتتىق بانك تولەم تارتىبىنە وزگەرىس ازىرلەدى

استانا. KAZINFORM - قازاقستان ۇلتتىق بانكى تولەمدەر مەن اقشا اۋدارىمدارى ماسەلەلەرى بويىنشا «قازاقستان رەسپۋبليكاسى ۇلتتىق بانكى باسقارماسىنىڭ كەيبىر قاۋلىلارىنا وزگەرتۋلەر مەن تولىقتىرۋلار ەنگىزۋ تۋرالى» ۇلتتىق بانكتىڭ باسقارما قاۋلىسىنىڭ جوباسىن ازىرلەدى.

جوبا تۇرعىن ءۇي قۇرىلىسى جانە تۇتىنۋشىلاردىڭ قۇقىقتارىن قورعاۋ ماسەلەلەرى بويىنشا زاڭداردىڭ ەرەجەلەرىن ىسكە اسىرۋ ماقساتىندا ازىرلەندى.

ماسەلەن، ۇلەستىك قاتىسۋ شارتتارى (ءۇ ق ش) بويىنشا بارلىق تولەم قولما-قول اقشاسىز نىساندا، ونىڭ ىشىندە ۋاكىلەتتى قۇرىلىس كومپانياسىنىڭ بانكتىك شوتىنا بانكتەر ارقىلى قولما-قول اقشا ەنگىزۋ جولىمەن جۇزەگە اسىرىلۋعا ءتيىس ەكەنى كوزدەلەتىن تولەمدەر جانە تولەم جۇيەلەرى تۋرالى زاڭعا تولىقتىرۋ ەنگىزىلەدى.

- بۇل تالاپ تەك باستاپقى نارىقتاعى مامىلەلەرگە (سالىنىپ جاتقان كوپپاتەرلى تۇرعىن ۇيدەگى نەمەسە جەكە تۇرعىن ءۇي كەشەنىندەگى ۇلەستى ساتىپ الۋ) قولدانىلادى جانە تىركەلمەگەن ءۇ ق ش- مەن بايلانىستى تاۋەكەلدەردەن ۇلەسكەرلەردىڭ قۇقىقتارىن قورعاۋعا باعىتتالعان.

ۇلەسكەر تولەمدى جۇرگىزۋ ءۇشىن ارنايى تولەم بەلگىلەۋ كودىن (تبك) جانە ۇلەستىك قاتىسۋ شارتىنىڭ ءنومىرىن كورسەتۋى كەرەك. بانكتەر وسىنداي ت ب ك- مەن تولەمدەردى قابىلداۋ كەزىندە ءبىرىڭعاي اقپاراتتىق جۇيەدە تىركەلگەن ءۇ ق ش- نىڭ بار-جوعىن تەكسەرەتىن بولادى. ەگەر شارت تىركەلمەگەن بولسا، ياعني ۋاكىلەتتى قۇرىلىس كومپانياسىنىڭ قاراجات جيناۋعا قۇقىعى بولماسا، وندا بانك تولەمدى قابىلداۋدان باس تارتادى، - دەلىنگەن ۇلتتىق بانك حابارلاماسىندا.

بۇدان باسقا، تۇتىنۋشىلاردىڭ قۇقىقتارىن قورعاۋ ماسەلەلەرى بويىنشا زاڭعا سايكەس كەلتىرۋگە باعىتتالعان تۇزەتۋلەر ەنگىزىلەدى.

- جوبادا تابيعي نەمەسە تەحنوگەندىك سيپاتتاعى توتەنشە جاعداي كەزىندە زارداپ شەككەندەرگە (جەكە تۇلعالارعا) تولەنگەن اقشالاي قاراجاتتى ءۇشىنشى تۇلعالاردىڭ ءوندىرىپ الۋىنا تىيىم سالاتىن جاڭاشىلدىق كوزدەلگەن. بۇل تالاپ وسىنداي تولەمدەردىڭ ساقتالۋىن جانە حالىقتىڭ ولاردى نىسانالى پايدالانۋىن قامتاماسىز ەتۋگە باعىتتالىپ وتىر. وسىلايشا، بانكتەر ت ج كەزىندە زارداپ شەككەندەرگە وتەماقى تولەۋگە قاتىستى بولسا، ولاردى ءوندىرىپ الۋ تۋرالى ءۇشىنشى تۇلعالاردىڭ تالاپتارىن ورىنداۋسىز قالدىرادى، - دەلىنگەن حابارلامادا.

سونىمەن قوسا، جوبا قۇقىقتىق مونيتورينگ قورىتىندىسى بويىنشا ەنگىزىلەتىن باسقا دا ناقتىلاۋشى جانە رەداكسيالىق وزگەرىستەردى قامتيدى.

قاۋلى جوباسىمەن «اشىق ن ق ا» پورتالىندا تانىسۋعا بولادى.

ايتا كەتەلىك قازاقستاندا ۇلەسكەرلەردى قولداۋ ورتالىعى قۇرىلاتىنى تۋرالى جازعان ەدىك.