LRT العاشقى ەكى قۇرامى استاناعا جەتكىزىلدى

استانا. KAZINFORM - ەلورداعا جەڭىل رەلستى كولىكتىڭ العاشقى جىلجىمالى قۇرامى جەتكىزىلدى. قۇرامدار ارنايى جابدىقتالعان اۆتوترالدارمەن اكەلىندى. ولاردىڭ ءارقايسىسى ءتورت ۆاگوننان تۇرادى. بۇل تۋرالى CTS كولىك كومپانياسى حابارلادى.

- ۆاگوندار تاڭشان قالاسىندا (قىتاي) شىعارىلدى. اۆتوكولىكپەن جەتكىزۋ قىتاي مەن قازاقستان اۋماقتارى ارقىلى وتەتىن، ۇزىندىعى 5300 ك م- دەن اساتىن مارشرۋت بويىنشا جۇزەگە اسىرىلدى. بۇكىل جول 10 كۇنگە سوزىلدى. اۆتوترال پلاتفورمالارىنا سەكسيالاردى تيەۋ تىكەلەي ءوندىرۋشى زاۋىتتاعى كرانداردىڭ كومەگىمەن جۇزەگە اسىرىلدى. مارشرۋتتىڭ بارلىق كەزەڭىندە جۇكتەردىڭ بەكىتىلۋى مەن قاۋىپسىزدىكتىڭ قاتاڭ شارالارى قامتاماسىز ەتىلدى، - دەلىنگەن حابارلامادا.

ۇزىندىعى 60 مەترلىك جىلجىمالى قۇرامدار GOA 4 دەڭگەيىندەگى اۆتوماتتاندىرىلعان باعدارلامالىق-اپپاراتتىق كەشەنمەن جابدىقتالعان، ول كەلەسى فۋنكسيالاردى قامتاماسىز ەتەدى: ەسىكتەردىڭ اۆتوماتتى تۇردە اشىلىپ-جابىلۋى، توقتاۋ جانە جىلدامداتۋ، دەپوعا كىرۋ جانە شىعۋ، قۇرامداردىڭ جاعدايىن باقىلاۋ، سونداي-اق پويىزدار اراسىنداعى قاشىقتىقتى قاداعالاۋ.

- قۇرامدار تولىقتاي اۆتوماتتاندىرىلعان، باسقارۋ جۇيەسى جۇرگىزۋشىسىز جۇزەگە اسىرىلادى جانە وپەراتورلار تاراپىنان ۇنەمى باقىلاۋدا بولادى. اتالعان قۇرامداردى ءوندىرۋ بارىسىندا زاماناۋي، جەڭىل جانە بەرىك ماتەريالدار قولدانىلدى. بۇل شەشىم جولاۋشىلارعا قولايلى ديناميكالىق سيپاتتامالار مەن جوعارى دەڭگەيدەگى اكۋستيكالىق جايلىلىقتى قامتاماسىز ەتۋگە باعىتتالعان، - دەلىنگەن حابارلامادا.

قۇرامداردىڭ جالپى تەحنيكالىق پارامەترلەرى:

- ۇزىندىعى - 59,97 م، ەنى - 2,8 م، بيىكتىگى - 3,8 م؛

- قۋات كوزى ءتۇرى: ءۇشىنشى رەلس، 750 ۆ؛

- سىيىمدىلىعى: 600 دەن استام جولاۋشى؛

- ەڭ جوعارى جىلدامدىعى: 80 ك م/ساع؛

- ورتاشا پايدالانۋ جىلدامدىعى: 39,5  ك م/ساع؛

- سالماعى: 94 ت (جولاۋشىلارسىز).

ۆاگونداردى ساتىپ الۋ جانە تاسىمالداۋ EPC- كەلىسىمشارت شەڭبەرىندە جۇزەگە اسىرىلادى، ياعني جەكە بيۋدجەتتىك قارجىلاندىرۋ بولىنبەيدى.

ايتا كەتەلىك جەڭىس قاسىمبەك 2026 -جىلدىڭ 1-توقسانىندا LRT رەسمي ىسكە قوسىلاتىنىن ايتقان ەدى.

اۆتور

نازىم بولەسوۆا