ەلەكتروندىق ساۋدا تاۋارلاردىڭ ساپاسىنا قاتىستى سۇراق كوپ - پرەمەر- مينيستر

استانا. KAZINFORM - وتكەن جىلى 2,7 ميللياردتان استام ادام ونلاين ساۋدا جاساعان. ەلىمىزدەگى ەلەكتروندىق ساۋدانىڭ قازىرگى جاي- كۇيى تۋرالى ۇكىمەت باسشىسى ولجاس بەكتەنوۆ ايتىپ بەردى.

Бектенов
Фото: Ағибай Аяпбергенов/Kazinform

- ەلەكتروندىق ساۋدا - الەمدىك ەكونوميكانىڭ ماڭىزدى سەگمەنتى. وتكەن جىلى 2,7 ميللياردتان استام ادام تاۋارلاردى ونلاين ساتىپ العان. ساتىلىمداردىڭ جالپى سوماسى شامامەن 6,3 تريلليون دوللارعا جەتتى. ونلاين ساۋدا ءبىزدىڭ ەلىمىزدە دە كەڭىنەن تانىمال. ماسەلەن، وتكەن جىلى ونىڭ كولەمى 3,2 تريلليون تەڭگەدەن اسىپ، بۇكىل بولشەك ساۋدانىڭ %14,5 قۇراعان. بۇل سالا 300 مىڭنان استام جۇمىس ورنىن قۇرۋعا مۇمكىندىك بەردى.

ال ەڭبەك ونىمدىلىگىنىڭ ءوسۋى دۇكەندەر مەن بازارداعى ساتىلىمدارعا قاراعاندا %30 اسىپ كەتتى، - دەدى ولجاس بەكتەنوۆ ۇكىمەت وتىرىسىندا.

پرەمەر- ءمينيستردىڭ ايتۋىنشا، ەلەكتروندىق ساۋدانىڭ قارقىندى دامۋى ۇلتتىق ەكونوميكاعا وڭ اسەر ەتەدى.

- بىزدەگى نارىقتىڭ اۋقىمدى بولىگىن شەتەلدىك ينتەرنەت- الاڭدار الىپ جاتىر. ولاردى وتاندىق تاۋارلار ەكسپورتىن ۇلعايتۋ ءۇشىن ءتيىمدى پايدالانۋعا بولادى. ەكىنشى جاعىنان، تۇتىنۋشىلاردىڭ قۇقىقتارى مەن زياتكەرلىك مەنشىكتى جانە ازاماتتاردىڭ دەربەس دەرەكتەرىن قورعاۋعا بايلانىستى ماسەلە تۋىندايدى. ماركەتپلەيستەردەگى تاۋارلاردىڭ ساپاسىنا قاتىستى دا سۇراق كوپ. شەتەلدىك الاڭدار تۇگىلى، وتاندىق ماركەتپلەيستەر دە ساپاعا كەپىلدىك بەرە المايدى. ءونىمنىڭ ءتۇپنۇسقالىعى تۋرالى اقپارات كوبىنەسە كورسەتىلمەيدى. بۇل ساپاسىز تاۋار ساتىپ العان تۇتىنۋشىلارمەن قاتار، باسەكەلى ءارى زاڭدى ساۋدا ءۇشىن قاۋىپتى، - دەيدى ول.

بۇعان دەيىن ساۋدا جانە ينتەگراتسيا ءمينيسترى بۇگىندە ستريمينگ ارقىلى ساۋدا جاساۋ سۇرانىسقا يە ەكەنىن ايتقان ەدى.

سوڭعى جاڭالىقتار