ەلەكتروندى ۇكىمەت جۇيەسىندە ەلەۋلى وزگەرىس بولادى - مينيستر

استانا. KAZINFORM - سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ eGov پورتالىندا بولعان اقاۋعا قاتىستى تۇسىنىك بەردى.

- مۇنداي اقاۋلار ءجيى بولمايدى دەپ ايتقىم كەلەدى. ەكىنشىدەن، كەشە جۇيە ينفراقۇرىلىمىنا ەرەكشە جۇكتەمە بايقالدى. وسىنداي جۇكتەمە بۇعان دەيىن بولماعان ەدى. قىسقا مەرزىمدە، ياعني ءبىر ساعاتتان از ۋاقىتتا 1 ميلليوننان استام ءوتىنىم كەلىپ تۇسكەن. جالپى، بىزدە ەلەكتروندى ۇكىمەتتىڭ ارحيتەكتۋراسىن، ونىڭ eGov قوسىمشاسىن وزگەرتۋ، سونداي-اق ەلەكتروندى ۇكىمەتتىڭ شليۋزىن جاقسارتۋ جوسپارلانعان. بۇل ءوز كەزەگىندە جۇيەگە جۇكتەمە ارتقان كەزدە، وسىنىڭ بارلىعىنا توتەپ بەرۋگە مۇمكىندىك بەرەدى، - دەدى ج. ماديەۆ پارلامەنت ماجىلىسىندە تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، كەشە eGov پورتالىنداعى اقاۋلاردى تۇزەتۋ ءۇشىن كۇنى بويى ءتيىستى ءىس- شارالاردى اتقارعان. قازىر ونىڭ نەگىزگى قىزمەتى قالپىنا كەلتىرىلگەن.

ەسكە سالساق، 1-ءساۋىر كۇنى eGov پورتالىندا ءبىرىنشى سىنىپقا قۇجات قابىلداۋ باستالدى. الايدا قازاقستاندىقتار تەحنيكالىق اقاۋلارعا تاپ بولدى.