مەمەلەكەت باسشىسى قاسىم-جومارت توقايەۆ وتان قورعاۋشى كۇنىمەن قۇتتىقتادى

قاسىم-جومارت توقاەۆ ەل جاۋىنگەرلەرى مەن كومانديرلەرى باتىر بابالارىمىزدىڭ داڭقتى جولىن جالعاستىرىپ، ناعىز وتانشىلدىق رۋحىنىڭ جارقىن ۇلگىسىن كورسەتىپ كەلە جاتقانىن اتا ءوتتى.

- قۇرمەتتى وتانداستار! بارشاڭىزعا وتان قورعاۋشى كۇنى قۇتتى بولسىن! مەملەكەتتىك ءارى قوعامدىق ماڭىزى ايرىقشا مەرەكەدە جاۋىنگەرلەرىمىزدىڭ ەرەن ەرلىگى، مىقتى رۋحى مەن قايتپاس قايسارلىعى كەڭىنەن دارىپتەلەدى. بۇل - قازاقستاننىڭ قاۋىپسىزدىگىن، تۇراقتىلىعى مەن تىنىشتىعىن كۇندىز-ءتۇنى قاس قاقپاي كۇزەتكەن، سونداي-اق ءقازىر وتان الدىنداعى بورىشىن ادال وتەپ جاتقان بارشا ازاماتقا قۇرمەت كورسەتىلەتىن كۇن. ەل جاۋىنگەرلەرى مەن كومانديرلەرى باتىر بابالارىمىزدىڭ داڭقتى جولىن جالعاستىرىپ، ناعىز وتانشىلدىق رۋحىنىڭ جارقىن ۇلگىسىن كورسەتىپ كەلەدى. ساردارلار مەن ساربازداردىڭ، بارلىق كۇشتىك قۇرىلىم قىزمەتكەرلەرىنىڭ بىتىمگەرلىك ميسسيالار، ارناۋلى وقۋ-جاتتىعۋ جيىندارى مەن ءتۇرلى حالىقارالىق سايىستار كەزىندەگى كاسىبي شەبەرلىگى، تەمىردەي ءتارتىبى مەن جاۋىنگەرلىك دايارلىعى - سونىڭ ايقىن دالەلى. قۋاتتى اسكەرىمىز ەڭ كۇردەلى مىندەتتەردى ورىنداۋعا قاشاندا دايىن ەكەنى ءسوزسىز. سوندىقتان مەملەكەت ەلىمىزدىڭ قورعانىس قابىلەتىن كۇشەيتۋگە جانە اسكەري قىزمەتشىلەردىڭ الەۋمەتتىك جاعدايىن جاقسارتۋعا ءاردايىم باسا ءمان بەرەدى، - دەدى توقايەۆ.

پرەزيدەنت جاڭا كونستيتۋتسيادا «قازاقستان رەسپۋبليكاسىن قورعاۋ — ونىڭ ءار ازاماتىنىڭ قاسيەتتى پارىزى مەن مىندەتى» دەپ جازىلعانىن العا تارتتى.

— وسى اسا ماڭىزدى تۇجىرىم مەملەكەت پەن حالىقتىڭ تىعىز بايلانىسىن، ەل تاعدىرىنا ءاربىر وتانداسىمىزدىڭ جاۋاپتى ەكەنىن اڭعارتادى. ءبىز وتانعا قالتقىسىز قىزمەت ەتۋ قاعيداتىن جانە كونستيتۋتسيادا ايقىندالعان مىزعىماس قۇندىلىقتاردى نەگىزگە الا وتىرىپ، سان عاسىرلىق تاريحى بار مەملەكەتتىلىگىمىزدىڭ تۇعىرىن نىعايتا تۇسەمىز، بيىك ماقسات-مۇراتىمىزعا جەتىپ، ادىلەتتى، كۇشتى، ءقاۋىپسىز قازاقستاندى قۇرامىز. مەن بۇعان كامىل سەنەمىن. انتىنا ادال بولىپ، تاباندىلىق تانىتىپ، ءمىنسىز قىزمەت ەتىپ جۇرگەن وتان قورعاۋشىلارىمىزعا العىس ايتامىن. بارشا ازاماتتارىمىزعا مىقتى دەنساۋلىق، اماندىق جانە تابىس تىلەيمىن! ارميامىزدىڭ ايبىنى، حالقىمىزدىڭ ىنتىماعى ارتا بەرسىن! قاستەرلى تاۋەلسىزدىگىمىزدىڭ تۇعىرى بەكەم بولسىن! — دەدى مەملەكەت باسشىسى.

وسىدان بۇرىن پرەزيدەنتتىڭ جارلىعىمەن اسكەري جانە قىزمەتتىك بورىشىن اتقارۋدا كورسەتكەن ەرلىگى مەن جانقيارلىعى، ەلدىڭ ۇلتتىق قاۋىپسىزدىگى مەن قورعانىس قابىلەتىن قامتاماسىز ەتۋگە، زاڭدىلىق پەن قۇقىقتىق ءتارتىپتى نىعايتۋعا قوسقان ۇلەسى ءۇشىن ءبىر توپ ازامات مەملەكەتتىك ناگرادامەن ماراپاتتالدى.