ەلەك وزەنىندەگى سۋ دەڭگەيى قاۋىپتى دەڭگەيدەن اسىپ كەتتى - ۆيدەو

ورال. KAZINFORM - باتىس قازاقستان وبلىسى شىڭعىرلاۋ اۋدانىندا ەلەك وزەنىندەگى سۋ دەڭگەيى قاۋىپتى دەڭگەيدەن اسىپ كەتتى.

«قازگيدرومەت» ر م ك ب ق و فيليالىنىڭ ديرەكتورى تىلەگەن شاپانوۆتىڭ ءمالىم ەتكەنىندەي، وزەننىڭ سۋى شىلىك گيدرولوگيالىق بەكەتىندە ءبىر تاۋلىك ىشىندە 186 سانتيمەترگە كوتەرىلىپ، 785 سانتيمەترگە (قاۋىپتى دەڭگەي - 750 س م) جەتتى.

«رەسەيدىڭ ورىنبور وبلىسى جاعىنان سۋ كەلىپ جاتىر. سۋ دەڭگەيى 800 سانتيمەتردەن اسقان جاعدايدا اۋداننىڭ وزەن بويىندا ورنالاسقان ەلدى مەكەندەرىنە قاۋىپ ءتونۋى ىقتيمال»، - دەدى ت. شاپانوۆ.

«قازگيدرومەت» ر م ك ب ق و فيليالىنىڭ مالىمەتى بويىنشا جايىق وزەنىندەگى سۋ دەڭگەيى ءبىر تاۋلىك ىشىندە ورال قالاسى تۇسىندا 84 سانتيمەترگە كوتەرىلىپ، 457 سانتيمەترگە (قاۋىپتى دەڭگەي - 850 س م) جەتتى.

شاعان وزەنى چۋۆاشين اۋىلى تۇسىندا 1211 (قاۋىپتى دەڭگەي - 1280-1300 س م)، دەركول بەلەس ماڭىندا 670 (600-650)، قاراوزەن جالپاقتالدا 756 (790-820) سانتيمەتردى كورسەتتى.

شىڭعىرلاۋ اۋدانىنىڭ اكىمى مۇرات ومىراليەۆ جاعدايدىڭ باقىلاۋدا ەكەندىگىن جەتكىزدى.

«ەلەك وزەنىنىڭ سۋى ءوتىپ جاتىر. ازىرگە ەلدى مەكەندەرگە قاۋىپ ءتونىپ تۇرعان جوق»، - دەدى م. ومىراليەۆ.

ەسكە سالا كەتەيىك، بۇدان بۇرىن ورالدا كارديولوگيالىق ورتالىقتا ەمدەلىپ جاتقان ناۋقاستاردىڭ كوشىرىلگەنىن جازعان بولاتىنبىز.

سونداي-اق باتىس قازاقستاندا ولگەن مال سانى 1 مىڭنان استى.

اۆتور
عايساعالي سەيتاق