ەلدەگى قاي جولدار سىرتقى قارىز ەسەبىنەن سالىنىپ جاتىر
استانا. KAZINFORM - قارجى مينيسترلىگى Kazinform ساۋالىنا جولداعان جاۋابىندا سىرتقى قارىزدىڭ ەسەبىنەن ىسكە اسىرىلىپ جاتقان جوبالاردى اتادى.
«ۇكىمەت قارىزدارى ءبىرىنشى كەزەكتە جۇمىس ورىندارىن ۇلعايتۋعا جاعداي جاسايتىن، بيۋدجەتكە قوسىمشا تۇسىمدەر اكەلەتىن جانە ماتەريالدىق اكتيۆتەردى قۇرۋعا باعىتتالعان، الەۋمەتتىك ماڭىزى بار جوبالارعا تارتىلۋدا. بۇگىنگى تاڭدا مەملەكەتتىك سىرتقى قارىزداردىڭ قولدانىستاعى پورتفەلى ءبىرقاتار ءىرى ينفراقۇرىلىمدىق، سونداي- اق ەكونوميكانىڭ ءارتۇرلى سالالارىنداعى الەۋمەتتىك ماڭىزى بار جوبالاردى قامتيدى»، - دەپ جازىلعان مينيسترلىك مالىمەتىندە.
ناقتىراق ايتساق، سىرتقى قارىزدار 4 باعىتتاعى جوبالارعا جۇمسالىپ وتىر.
اۆتوجول سالاسىندا:
- الماتى جانە قاراعاندى وبلىستارىندا - «قۇرتى- بۋرىلبايتال»، «ۇزىناعاش- وتار» ، «بالقاش- بۋرىلبايتال»؛
- اقتوبە جانە اتىراۋ وبلىستارىندا - «اقتوبە- ماقات»؛
قىزىلوردا جانە تۇركىستان وبلىستارىندا - « قىزىلوردا وبلىسىنىڭ شەكاراسى - شىمكەنت» جول ۋچاسكەلەرىن رەكونسترۋكتسيالاۋ؛
سۋمەن جابدىقتاۋ سەكتورىندا:
- الماتى، جامبىل، تۇركىستان جانە قىزىلوردا وبلىستارىندا «يرريگاتسيالىق جانە درەناجدىق جۇيەلەردى جەتىلدىرۋ» جوباسىنىڭ ەكىنشى كەزەڭى».
ءبىلىم بەرۋ جانە عىلىمي زەرتتەۋلەر سالاسىندا:
- «ءونىمدى يننوۆاتسيالاردى ىنتالاندىرۋ»،
- «ورتا ءبىلىم بەرۋدى جاڭعىرتۋ» جوبالارى؛
مەملەكەتتىك سەكتوردى جەتىلدىرۋ شەڭبەرىندە:
- كەدەن پۋنكتتەرىن جاڭعىرتۋ جونىندەگى جوباسى.
مينيسترلىكتەگىلەر اتالعان قارىزداردىڭ پايىزدىق مولشەرلەمەسى مەن نەگىزگى سومانىڭ سىرتىنداعى ارتىق تولەمنىڭ مولشەرىن اشىپ ايتۋدان باس تارتىپ وتىر.
«ۇكىمەتتىك سىرتقى قارىزداردى تارتۋ مولشەرلەمەلەرى بويىنشا دەرەكتەردى اشۋ كرەديتورلار ءۇشىن سەزىمتال اقپارات بولىپ تابىلاتىنىن جانە كەيىنگى قارىز الۋ شارتتارىنا تەرىس اسەر ەتۋى مۇمكىن ەكەنىن اتاپ وتەمىز»، - دەلىنگەن جاۋاپتا.
بۇعان دەيىن قازاقستان ۇكىمەتى قاي ەلگە قانشا قارىز ەكەنىن جازعان بولاتىنبىز.
