ەلدىڭ ماقتا ءونىمى قاي ەلدەرگە ەكسپورتتالادى

استانا. KAZINFORM - قازاقستاندا 25 مىڭنان استام اگروقۇرىلىم ماقتا شارۋاشىلىعىمەن اينالىسادى. بۇل تۋرالى ا ش م باسپا ءسوز قىزمەتى حابارلادى.

ماقتا شارۋاشىلىعى - قازاقستاننىڭ اگروونەركاسىپتىك كەشەنىندەگى ماڭىزدى سالالاردىڭ ءبىرى. بۇل سالا حالىقتى جۇمىسپەن قامتۋعا جانە وڭدەۋ ونەركاسىبىن دامىتۋعا ەلەۋلى ۇلەس قوسىپ وتىر.

ماقتا ەگىلەتىن نەگىزگى القاپتار تۇركىستان وبلىسىندا ورنالاسقان. مۇندا 25 مىڭنان استام اۋىل شارۋاشىلىعى قۇرىلىمى جۇمىس ىستەيدى، ولاردا شامامەن 70 مىڭ ادام ەڭبەك ەتەدى.

- 2024 -جىلى ماقتا ەگىسىنىڭ كولەمى 106,4 مىڭ گەكتاردى قۇراپ، گەكتارىنا 28,3 سەنتنەر ءونىم الىنعان. ناتيجەسىندە 301,7 مىڭ توننا ماقتا شيكىزاتى جينالدى. بيىل زاماناۋي تەحنولوگيالاردى قولدانۋ ەسەبىنەن ەگىس كولەمىن 135,2 مىڭ گەكتارعا دەيىن ۇلعايتۋ جوسپارلانىپ وتىر، - دەلىنگەن ا ش م حابارلاماسىندا.

سالا مەملەكەتتىك قولداۋ مەن سۋ ۇنەمدەۋ تەحنولوگيالارىنىڭ ەنگىزىلۋى ارقاسىندا تۇراقتى دامىپ كەلەدى.

مىسالى، تامشىلاتىپ سۋارۋ تەحنولوگياسى قولدانىلاتىن القاپ كولەمى 50 مىڭ گەكتارعا دەيىن ۇلعايىپ، ءداستۇرلى تاسىلمەن ەگىلەتىن ەگىستىك كولەمى 19,3 مىڭ گەكتارعا ازايماق. بۇل سۋ رەسۋرستارىن ۇنەمدەۋگە جانە كليماتتىق وزگەرىستەرگە بەيىمدەلۋگە مۇمكىندىك بەرەدى.

- مەملەكەت تاراپىنان ماقتا وندىرۋشىلەرگە كەشەندى قولداۋ كورسەتىلىپ وتىر. اتاپ ايتقاندا: ماقتا ءوسىرۋدىڭ تولىق سيكلىنە سۋبسيديا بەرىلەدى؛ مينەرالدى تىڭايتقىشتار قۇنىنىڭ %60 نا دەيىن؛ پەستيتسيدتەردىڭ %50 نا دەيىن؛ بيولوگيالىق اگەنتتەر مەن بيوپرەپاراتتاردىڭ %40 نا دەيىن؛ ءتۇپنۇسقا جانە ەليتالىق تۇقىم ساتىپ الۋعا %70 نا دەيىن؛ ماقتا تۇقىمىنا - %100 كولەمدە (باسقا داقىلدار ءۇشىن 15-%50)؛ سۋارمالى سۋ جەتكىزۋ شىعىندارىن وتەۋ - تەحنولوگيا تۇرىنە بايلانىستى %50- 85؛ سونداي-اق ينۆەستيسيالىق سۋبسيديالار قاراستىرىلعان، - دەلىنگەن حابارلامادا.

قازاقستان جىل سايىن 300 مىڭ توننادان استام ماقتا شيكىزاتىن جانە 70- 75 مىڭ توننا ماقتا تالشىعىن وندىرەدى. ءونىمنىڭ %85 ى لاتۆيا، تۇركيا، رەسەي، قىتاي جانە وزگە ەلدەرگە ەكسپورتتالادى. الايدا، قوسىلعان قۇندى ارتتىرۋ جانە سىرتقى نارىققا تاۋەلدىلىكتى ازايتۋ ءۇشىن تەرەڭ وڭدەۋدى دامىتۋ باستى نازاردا.

ماقتا سالاسىن دامىتۋ جونىندەگى جول كارتاسى جانە ماقتا- توقىما كلاستەرىن قولداۋ اياسىندا تۇركىستان وبلىسىندا «تۇركىستان ماقتا اگروونەركاسىپتىك كەشەنى» جشس مەن «تۇركىستان الەۋمەتتىك- كاسىپكەرلىك كورپوراتسياسى» ا ق-نىڭ قاتىسۋىمەن ءىرى ينۆەستيتسيالىق جوبا ىسكە اسىرىلىپ جاتىر.

جوبانىڭ جالپى قۇنى - 146,8 ميلليارد تەڭگە. اياسىندا 50 مىڭ گەكتار ەگىستىك يگەرىلىپ، سونىڭ 32 مىڭ گەكتارى بيىل تامشىلاتىپ سۋارىلاتىن بولادى. 4 مىڭنان استام جۇمىس ورنى اشۋ كوزدەلگەن.

زاماناۋي تەحنولوگيالاردى ەنگىزۋ، مەملەكەتتىك قولداۋ شارالارىن كۇشەيتۋ جانە ءىرى ينۆەستيتسيالىق جوبالاردى ىسكە اسىرۋ - قازاقستاندا ماقتا شارۋاشىلىعىنىڭ ۇزاق مەرزىمدى ءارى تۇراقتى دامۋىنا، سونداي-اق ەلدىڭ ەكسپورتتىق الەۋەتىنىڭ ارتۋىنا بەرىك نەگىز قالايدى.