ەلدەگى بانكتەرگە «يسلام تەرەزەسىن» اشۋعا رۇقسات بەرەتىن زاڭ جوباسى تامىزدا پارلامەنتكە تۇسەدى

استانا. KAZINFORM - قازاقستاننىڭ بانك جۇيەسىندەگى يسلام بانكتەرىنىڭ جيىنتىق ۇلەسى 0,4 پايىز عانا. قارجى نارىعىن دامىتۋ جانە رەتتەۋ اگەنتتىگى باسقارما ءتوراعاسىنىڭ ورىنباسارى نۇرلان ءابدراحمانوۆ سەناتتا وتكەن ۇكىمەت ساعاتىندا وسىنداي دەرەك كەلتىردى.

- بۇگىنگى تاڭدا ەلىمىزدە يسلام بانكتەرىن اشىپ، جۇمىس ىستەۋگە زاڭنامادا جاعداي جاسالعان. ءبىراق وكىنىشكە قاراي، ولاردىڭ بۇكىل بانكتەر اكتيۆىندە ۇلەسى تومەن ەكەنىن ايتۋعا ءماجبۇرمىن. بىزدە ەكى يسلام بانكى بار - Al Hilal Bank جانە Zaman Bank. ولاردىڭ بۇكىل بانكتەر جۇيەسىنىڭ اكتيۆىندەگى ۇلەسى 0,4 پايىز عانا. بۇل قۇرالدى دامىتۋ ءۇشىن نە ىستەۋ كەرەك؟ ءتىپتى يسلام مەملەكەتتەرىنىڭ وزىندە يسلام قارجىسى ءداستۇرلى بانك بيزنەسىمەن پاراللەلدە جۇمىس ىستەيدى. وسىعان بايلانىستى مەملەكەت باسشىسىنىڭ تاپسىرماسىمەن بانك ءىسى جانە قىزمەتى تۋرالى جاڭا جاڭ ازىرلەپ جاتىرمىز. وسى تامىز ايىنا قاراي پارلامەنت قاراۋىنا ءتۇسۋى كەرەك. وسى قۇجاتتا ءداستۇرلى بانكتەردەن «يسلام تەرەزەسىن» اشۋعا مۇمكىندىك بەرەتىن نورمالار ۇسىنىپ وتىرمىز، - دەدى ول سەناتورلاردىڭ سۇراعىنا جاۋاپ بەرە وتىرىپ.

ايتۋىنشا، بۇل نورما قازاقستاننىڭ جەرگىلىكتى كوممەرتسيالىق بانكتەرىنە پايىزدىق نەسيە دە، يسلام شارتى بويىنشا پايىزسىز نەسيە دە بەرۋگە مۇمكىندىك اشادى.

- بۇل يسلام شارتىمەن قارجىلاندىرۋدىڭ اۋقىمىن كەڭەيتەدى. ەكىنشى جاعىنان ءبىز ەلىمىزگە يسلام بانكتەرىنىڭ كوبىرەك كەلۋىن كۇتىپ وتىرمىز. ويتكەنى جاڭا زاڭ يسلام شارتىمەن جۇمىس ىستەيتىن قارجى ينستيتۋتتارىنىڭ ەلدە بولىمشەلەرىن اشىپ، جۇمىس ىستەۋىنە جاعداي جاسايدى، - دەدى اگەنتتىك ءتوراعاسىنىڭ ورىنباسارى.

ەسكە سالساق، 2024-جىلدىڭ اياعىندا «وتباسى بانك» «پايىزسىز» يپوتەكاعا يسلام بانكتەرىنىڭ قارجىسىن تارتۋى مۇمكىن ەكەنى ايتىلعان ەدى.