ەلدوس سمەتوۆتىڭ باپكەرىنىڭ ايلىعىنا 4 ميلليون تەڭگە قوسىلدى
تاراز. KAZINFORM - كەلەسى ايدان باستاپ الەم چەمپيوناتىنىڭ جەڭىمپازى جارقىناي راحىمبايەۆا جانە قولا جۇلدەگەر سەرعالي ءابىلدا، بيىلعى پاراليمپيادانىڭ پاراجۇزۋدەن كۇمىس جۇلدەگەرى نۇرداۋلەت جۇماعالي مەن باپكەرى ساتتار بەيسەمبايەۆتىڭ جالاقىسى وسەدى.
ال ەلدوس سمەتوۆتىڭ باپكەرى كەلەسى وليمپياداعا دەيىن اي سايىن 4 ميلليون تەڭگە قوسىمشا جالاقى الادى. وسى اپتادا وتكەن جامبىل وبلىستىق ءماسليحاتىنىڭ سەسسياسىندا وسىنداي شەشىم قابىلداندى.
جارقىناي راحىمبايەۆا جانە سەرعالي ءابىلدا 16-26-تامىز ارالىعىندا كيشينيەۆ قالاسىندا وتكەن جارىستا ارمرەستلينگتەن جۇلدەگەر اتانعان بولاتىن.
جۇلدەگەرلەر جالاقىسىنىڭ كوتەرىلۋى جامبىل وبلىسى اكىمدىگىنىڭ 2017-جىلعى 27-قاراشاداعى 262-قاۋلىسىنا سايكەس جۇزەگە استى. ەندى جارقىناي راحىمبايەۆانىڭ بۇعان دەيىن الىپ كەلگەن جالاقىسىنا - 162448 تەڭگە، سەرعالي ءابىلدانىڭ جالاقىسىنا - 81244 تەڭگە، نۇرداۋلەت جۇماعاليدىڭ جالاقىسىنا - 2148744 تەڭگە، ساتتار بەيسەمبايەۆتىڭ جالاقىسىنا - 974668 تەڭگە قوسىلادى.
باپكەر ساتتار بەيسەمبايەۆ وسىعان دەيىن 385044 تەڭگە جالاقى الىپ كەلسە، نۇرداۋلەت جۇماعاليدىڭ جالاقىسى 1271812 تەڭگە كولەمىندە بولعان.
تاعى ءبىر ايتارى، وليمپيادا ويىندارىنىڭ التىن جۇلدەگەرى ەلدوس سمەتوۆتىڭ جاتتىقتىرۋشىسى عالىمجان جىلگەلديەۆتىڭ دە جالاقىسىنا قىركۇيەك ايىنان باستاپ 4 ميلليون تەڭگە قوسىلدى. بۇل سپورت جانە دەنە شىنىقتىرۋ اگەنتتىگى ءتوراعاسىنىڭ 2014-جىلعى 28-شىلدەدەگى بۇيرىعىنا سايكەس جۇزەگە استى.
جامبىل وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ ماماندارى بۇل - سپورتشىلاردىڭ الەمدىك دودالاردا جۇلدە الۋىنا بايلانىستى جالاقىسىنا اۆتوماتتى تۇردە قوسىلاتىن تولەم ەكەنىن ايتادى.
ال، ەلدوس سمەتوۆتىڭ جالاقىسىنا ازىرگە ەشقانداي اقشا قوسىلعان جوق. سمەتوۆ وبلىس اكىمىنىڭ قاۋلىسىنا سايكەس ەڭ جوعارى جالاقى - 2684000 تەڭگە الادى.
ەندى جامبىل وبلىستىق سپورت باسقارماسى قاۋلىعا وزگەرىستەر ەنگىزىپ، چەمپيوننىڭ دا جالاقىسىن كوتەرۋگە قادامدار جاساپ جاتىر. بۇل كەلەسى جىلدان باستاپ ىسكە اسۋى مۇمكىن.
