ەلدە زاڭسىز ويىن بيزنەسى تومەندەدى

استانا. KAZINFORM - باس پروكۋراتۋرادا ونلاين-كازينولارعا قارسى ءىس-قيمىل جانە زاڭسىز ويىن قىزمەتىمەن بايلانىستى قارجىلىق اعىنداردى بۇعاتتاۋ ماسەلەلەرى بويىنشا ۆەدومستۆوارالىق ءماجىلىس ءوتتى.

جيىنعا ۇلتتىق بانك، تۋريزم جانە سپورت مينيسترلىگى، سونداي-اق باسقا دا مۇددەلى مەملەكەتتىك ورگانداردىڭ وكىلدەرى قاتىستى.

ينتەرنەتتە زاڭسىز قۇمار ويىنداردىڭ اۋقىمدى تارالۋىنان تۋىنداعان وزەكتى قاۋىپتەر تالقىلانىپ، قارسى ءىس-قيمىلدىڭ تيىمدىلىگىن ارتتىرۋدىڭ بىرلەسكەن تاسىلدەرى ازىرلەندى.

ءماجىلىستىڭ قورىتىندىسى بويىنشا ءتيىستى مەملەكەتتىك ورگاندارعا تسيفرلىق باقىلاۋ، قارجىلىق مونيتورينگ جانە زاڭسىز ارەكەتتەرگە توسقاۋىل قويۋ بولىگىندە قوسىمشا شارالار قابىلداۋ تاپسىرىلدى.

- بيىل زاڭسىز ويىن بيزنەسىن ۇيىمداستىرۋ فاكتىلەرىنىڭ %22,2 عا (45 تەن 32-گە دەيىن) تومەندەۋى بايقالادى. ونلاين-كازينولاردى تولتىرۋعا ارنالعان 50 دەن استام بانك شوتتارى انىقتالىپ، بۇعاتتالدى، - دەلىنگەن حابارلامادا.

تىيىم سالىنعان ينتەرنەت-رەسۋرستارعا قول جەتكىزۋدى شەكتەۋ جونىندە بەلسەندى جۇمىس جالعاسىپ جاتىر.

دەگەنمەن، وسى قىلمىستار قاتەر توندىرۋدە جانە دەن قويۋدىڭ جۇيەلى شارالارىن تالاپ ەتەدى.

باس پروكۋراتۋرا زاڭسىز ويىن بيزنەسىن ۇيىمداستىرعان ءۇشىن مۇلىك تاركىلەنىپ، جەتى جىلعا دەيىن باس بوستاندىعىنان ايىرۋ تۇرىندەگى جازانى قاراستىراتىن قىلمىستىق كودەكستىڭ 307-بابى بويىنشا قىلمىستىق جاۋاپتىلىق تۋرالى ەسكەرتەدى.