ەلدە ترانسپلانتاتسيا جاسالاتىن ورگانعا ارنالعان اپپارات سىناقتان ءوتىپ جاتىر

استانا. KAZINFORM - ەلىمىزدە دونورلىق ورگانداردى ءبىر وڭىردەن ەكىنشى وڭىرگە قاۋىپسىز ءارى جىلدام جەتكىزۋگە مۇمكىندىك بەرەتىن اپپارات ازىرلەنىپ جاتىر.

 «University Medical Center» كورپوراتيۆتىك قورىنىڭ باسقارما ءتوراعاسى، مەديتسينا عىلىمىنىڭ دوكتورى يۋري پيا ءمالىم ەتتى.

- «الەم» اپپاراتىن ازىرلەۋ يدەياسى ۇشاقتىڭ اۋا رايىنىڭ قولايسىزدىعىنا بايلانىستى قونا الماۋىنان تۋىنداعان پروبلەما كەزىندە ويعا كەلدى. ۇشاق ەڭ جاقىن اۋەجايعا باعىت الدى، ءبىراق ول جاقتا دا قونۋ مۇمكىن بولمادى، سوڭىندا قايتا الماتىعا ورالدى. سول كەزدە بىزگە جاڭا جۇيە قاجەت ەكەنىن تۇسىندىك، ويتكەنى قازاقستاننىڭ اۋماعى كەڭ، قالالاردىڭ اراسى وتە الشاق. ال قيىن ساتتە دونورلىق اعزانى 4 ساعاتتىڭ ىشىندە جەتكىزۋ كەرەك، بۇل مۇمكىن ەمەس، - دەدى يۋري پيا «قازاقستانداعى 100- جۇرەك ترانسپلانتاتسياسى» فورۋمى بارىسىندا ب ا ق وكىلدەرىنە سۇحبات بەرە تۇرىپ.

ماماننىڭ ايتۋىنشا، دونورلىق ورگانداردى تاسۋعا ارنالعان «الەم» اپپاراتى 5 جىل بويى زەرتتەلدى جانە بۇگىندە جانۋارلارعا سىناقتان وتكىزۋ كەزەڭى اياقتالۋعا جاقىن.

- قازىر قۇرالدى كلينيكالىق قولدانۋ ءۇشىن رۇقسات الىپ جاتىرمىز. بيىل ساۋىردەن كەيىن اپپاراتتى قولدانا باستايمىز دەپ ۇمىتتەنەمىن. تاعى ءبىر ماڭىزدى جايت، بۇل اپپاراتتى قازاقستان اۋماعىندا ءوندىرۋدى قالايمىز. قازىر اپپاراتتى جاساۋعا رۇقسات الدىق جانە استانادا وسى اپپاراتتى شىعاراتىن زاۋىت سالۋ جوسپاردا بار، - دەيدى يۋري پيا.

ايتا كەتسەك، ەلىمىزدە ورتا ەسەپپەن العاندا 1 ميلليون ادامعا كەمىندە 10 ترانسپلانتاتسيا قاجەت. وسى ورايدا مەديتسينا عىلىمىنىڭ دوكتورى يۋري پيا ترانسپلانتاتسيا تەك مەديتسينا ماسەلەسى ەمەس، قوعامنىڭ ورتاق پروبلەماسى ەكەنىن ءمالىم ەتتى.

ەسكە سالا كەتەيىك، ەلىمىزدە ترانسپلانتاتسيا جاسالاتىن ورگان ارنايى قۇرىلعىدا ساقتالاتىنى تۋرالى بىلتىر جازعان ەدىك.

اۆتور

داۋلەت ىزتىلەۋ