ەلدە تاۋار ساقتاۋ قويمالارىنا سۇرانىس ارتتى
استانا. KAZINFORM - جىلدىڭ العاشقى توقسانىندا ەلىمىزدەگى جۇك تاسىمالى 140 ميلليون توننا-شاقىرىمعا جەتتى. لوگيستيكالىق بەلسەندىلىك جىلدان جىلعا قارقىن الىپ كەلەدى.
ماسەلەن، بىلتىر سىرتقى ساۋدا اينالىمى 141 ميلليارد دوللاردان اسقان. ونىڭ جارتىسىنان استامى ەكسپورت ەنشىسىندە. ەلدە تاۋار ساقتاۋ قويمالارىنا سۇرانىس ارتتى. بىلتىر ەلىمىزدىڭ جالپى جۇك تاسىمالى 510 ميلليون توننا- شاقىرىمنان استى. كورسەتكىش بيىل دا جوعارى بولادى.
«قازىردىڭ وزىندە 140 ميلليوننان كوپ»، - دەيدى ماماندار.
قازاقستان ەۋروپا مەن ازيا اراسىنداعى وتكەل رەتىندە تانىمال. دەگەنمەن تۇيتكىل جوق ەمەس. ماسەلەن، ەلىمىزدە زاماناۋي جۇك ساقتايتىن قويمالار، حابتار مەن تاراتۋ ورتالىقتارى تاپشى. بۇگىندە الماتىداعى قويمالار %95، استانادا %98 تولى. ال حالىق اراسىندا قاجەتىن ونلاين ساتىپ الاتىنداردىڭ ۇلەسى ارتىپ كەلەدى. دەمەك ساقتاۋ ورىندارىنا سۇرانىس ەسەلەنە تۇسەدى.
سالا ماماندارى جالداۋ اقىسىنىڭ دا ءوسىپ جاتقانىن ايتادى. مىسالى، الماتىداعى باعا شارشى مەتر ءۇشىن 5 مىڭ تەڭگەگە جۋىقتاعان. ال Global Central Asia ساراپشىلارىنىڭ ەسەبىنە سۇيەنسەك، كەلەسى جىلى ا ساناتىنداعى نىسانداردى جالداۋ اقىسى تۇسە باستايدى. سەبەبى بىلتىر جاڭا عيماراتتار ايتارلىقتاي كوبەيگەن. 272 مىڭ شارشى مەتر پايدالانۋعا بەرىلدى، ال الداعى ەكى جىلدا كورسەتكىش 620 مىڭ شارشى مەتردەن اسادى.
«قازاقستانداعى قويمالار نارىعى قالىپتاسىپ كەلەدى. ساناتى، تەحنيكالىق سيپاتتامالارى، فۋنكسيونالدىلىق جانە ورنالاسۋ بويىنشا تالاپ قويىلادى. نارىق باعانى قالىپقا كەلتىرۋ جانە بولجامدى يندەكستەۋ كەزەڭىنە ەنەدى. بۇل ۇزاق مەرزىمدى جوسپارلاۋ تاۋەكەلدەرىن جويادى جانە لوگيستيكا، بولشەك ساۋدا، سونىمەن قاتار ءوندىرىس سالاسىندا جۇمىس ىستەيتىن حالىقارالىق جانە جەرگىلىكتى كومپانيالارعا مۇمكىندىكتەر اشادى» - دەيدى IBC Global باسقارۋشى سەرىكتەسى ستانيسلاۆ احمەدزيانوۆ.
ەلدە كوممەرتسيالىق نىساندار سانى ارتتى
ءيا، ينۆەستورلار كوممەرتسيالىق سەكتورعا كوڭىل بولە باستادى. ويتكەنى قويمالارعا سۇرانىس كوپ. ال باسەكە جوق. كىرىستىلىك جوعارى. ەلدە ونلاين ساۋدادان بولەك، ترانسشەكارالىق ساۋدا دامىپ جاتىر. بۇل دا تاۋاردى جىلدام تيەپ تاراتۋدى تالاپ ەتەدى. وسى رەتتە ءۇشىنشى تاراپ، ياعني تاۋاردى ساقتاپ، قاپتاپ، تاڭبالاپ جانە جەتكىزىپ بەرۋگە بەيىمدەلگەن وپەراتورلارمەن جۇمىس كۇشەيدى. ول ازداي قويما يەلەرى تۇتىنۋشىعا نەعۇرلىم جاقىن بولۋعا ۇمتىلىپ جاتىر. اسىرەسە ءىرى قالالاردا شاعىن اۋداندارعا ىڭعايلانعان جەتكىزۋ ورىندارىن كوبەيتۋ كەرەك.
پوشتالار بەلسەندى قولدانىپ جاتقان جۇك دروندارى دا قاشىقتاعى ەلدى مەكەندەردى جىلدام قامتۋعا مۇمكىندىك بەرەدى. ايتپاقشى، بيىل ەلدە وسىنداي درون زاۋىتىنىڭ قۇرىلىسى باستالادى. جوبا سەرىكتەسى - قىتايلىق كومپانيا.
قىتاي قازاقستان ارقىلى تاسىمالدى ارتتىردى
قىتاي دەمەكشى، بىلتىر كورشى ەل قازاقستان اۋماعى ارقىلى وزگە نارىققا 15,4 ميلليون توننا جۇك جونەلتتى. بۇل 2023 -جىلمەن سالىستىرعاندا %22 كوپ. كورشى ەل ءبىزدىڭ اۋماق ارقىلى جەرءۇستى كولىك قۇرالدارىن، ەلەكتر ماشينالارى مەن جابدىقتارىن تاسىمالدايدى. نەگىزگى باعىت وزبەكستان جانە ەۋرووداق، رەسەي سانالادى.
«كورسەتكىش ەكى تاڭبالى قارقىنمەن ءۇش جىل قاتارىنان ءوسىپ كەلەدى، ءبىراق وڭ ديناميكا بىرتىندەپ تومەندەپ جاتىر. مىسالى، 2022 -جىلى %37، 2023 -جىلى %33 بولدى. كەيىنگى 12 جىلدا تومەندەۋ تەك ەكى رەت، ياعني 2015 جانە 2016 -جىلدارى بايقالدى. ءبىر قىزىعى، قىتايدان جۇكتەردىڭ ترانزيتىن ۇلعايتۋدا وزبەكستان جانە ەۋرو وداق سياقتى الۋشى ەلدەر ەلەۋلى ءرول اتقاردى. رەسەي تاعى ءبىر ماڭىزدى باعىت بولا وتىرىپ، كەرىسىنشە، جالپى وڭ ديناميكانى السىرەتتى» - Data Hub ساراپشىلارى.
24.kz
