ەلدە قانشا بۇقارالىق اقپارات قۇرالى تىركەلگەن
استانا. KAZINFORM - مادەنيەت جانە اقپارات مينيسترلىگىنىڭ مالىمەتىنشە رەسپۋبليكادا بارلىعى 4871 بۇقارالىق اقپارات قۇرالى تىركەلگەن.
ونىڭ ىشىندە 3002 مەرزىمدى باسىلىم (گازەت، جۋرنال)، 236 تەلەارنا، 98 راديو، 1231 اقپارات اگەنتتىگى مەن ونلاين-باسىلىم بار. 2025 -جىلدىڭ I جارتىجىلدىعىندا ب ا ق رەەسترى جاڭارتىلىپ، ەل اۋماعىندا 140 ب ا ق قىزمەتىن توقتاتىپ (59 گازەت، 62 جۋرنال، 19 ينتەرنەت- باسىلىم)، تىركەۋدەن شىعارىلدى.
جىل باسىنان بەرى ينتەرنەت جەلىسىنەن 74130 زاڭعا قايشى ماتەريال انىقتالىپ، ولاردىڭ 36667 جويىلعان.
«ەۆرازيا» ارناسى رەسەيلىك «پەرۆىي كانال» ارناسىمەن بىرلەسىپ، قازاقستاندا «الليگاتور» اتتى 8 سەريالى كوركەم سەريال ءتۇسىردى. بۇگىندە «Qazaqstan» ارناسى تۇركيالىق «Kanal D» ارناسىمەن بىرگە «قايتا ورالعان ءۇمىت» اتتى 100 سەريالى تەلەحيكايانى جارىققا شىعارماق. «24KZ» ارناسى قىتايدىڭ CCTV‑4 ارناسىمەن «ورتالىق ازيا - قىتاي» سامميتى اياسىندا قازاقستان جايلى «ورتاق ءۇي» («وبشيي دوم» ) اتتى دەرەكتى فيلمنىڭ پرەمەراسىن وتكىزدى. «حابار» ارناسىندا «ۇلى دالا مەن اسپان استى ەلى: كورشىلەر، سەرىكتەستەر، دوستار» اتتى دەرەكتى فيلم كورسەتىلدى.
سونىمەن بىرگە، 2025 -جىلدىڭ ناۋرىز- ماۋسىم ايلارىندا Euronews Academy ءبىلىم بەرۋ جوباسى بويىنشا قازاقستاندا جۋرناليستيكا جانە مەديامەنەدجمەنت باعىتتارىندا 4 كاسىبي كۋرس ۇيىمداستىرىلدى.
«سۇر تاباقشالار» ناۋقانى اياسىندا شەتەلدىك سپۋتنيك قۇرىلعىلارىنا بالاما رەتىندە وتاندىق سپۋتنيك اپپاراتتارىن ساتىپ الۋعا ىنتالاندىرۋ ماقساتىندا سۋبسيديالاۋ باعدارلاماسى ىسكە قوسىلدى. الماتى، جامبىل، تۇركىستان وبلىستارىندا 300-دەن استام قۇرىلعى ساتىپ الۋ قۇنى سۋبسيديالاندى. جاقىن ارادا شەكارالاس ايماقتاردا تۇرعىندار 3000-نان استام اپپارات پايدالانادى دەپ جوسپارلانىپ وتىر.
