ەلدە ءسۇربويداق پەن كارى قىز كوبەيگەن

استانا. قازاقپارات - وردا بۇزار وتىزعا جەتسە دە، وتباسىن قۇرۋعا اسىقپايتىن جىگىتتەر كوپ. «شاشىمنىڭ ساناپ ءار اعىن، وتىزدان اسىپ بارامىن»، - دەيدى بويداقتار. تاڭداپتى، تالداپتى، كەيىن ۋاقىت ءوتىپ كەتكەنىن بايقاماي، قولدى اۋاعا قارماپتى.

انانىڭ كوزى ۇناماي، مىنانىڭ ءوزى ۇناماي، بويداق كوبەيدى، نەگە ولاي؟ ءسوزىن تىڭداپ، سەبەبىن سۇراپ كوردىك. بازىناسىنا قۇلاق تۇردىك.

بليتس: - جاعداي ىستەپ الۋ كەرەك. ءۇي الۋ كەرەك دەگەن سياقتى عوي. وعان دەيىن ۇيلەنبەيمىز ەندى.

- مانساپ جولىن قۋىپ، سونى قۇرۋىمىز كەرەك. سوسىن ءۇي بولۋ كەرەك.

- ءومىر ءسۇرۋدىڭ ءوزى وڭاي ەمەس، بىلمەيمىن.

ەلدەگى ەرلەر قاۋىمىنىڭ 40، بۇرىمدىلاردىڭ 30 پايىزى بويداق. ولار شاش ەتەكتەن شاشىلىپ توي جاساپ، تۇرمىستىق ءومىردىڭ قىزىعى مەن قيىندىعىن قاتار كورۋگە قورقادى- مىس.

سالت-جورالعىلاردىڭ كوبەيگەندىگى دە كوپشىلىكتىڭ كوڭىلىنە قاياۋ سالدىرعان سىڭايلى. بىتپەيتىن الىس-بەرىس ماتەريالدىق دايىندىقتى قاجەت ەتەدى.

باقتيار وسپانوۆ، ءدىن تانۋشى، ءداستۇر تانۋشى:

- ءبىزدىڭ قوعامدى جارىس دەگەن نارسە قۇرتىپ جاتىر. انادان قالمايمىن، مىنادان قالمايمىن دەگەن سياقتى نارسەلەر. انا وزبەك اعايىندار باي ۇلەنسە دە، كەدەي ۇيلەنسە دە، ورتاشاسى ۇيلەنسە دە، ولار سول ءبىر قويمەن-اق اتقارادى. ءبۇتىن تويدى ءبىر قازان پالاۋمەن نەمەسە شورپامەن اتقارىپ جىبەرەدى. سونداي شىعىنسىز نارسەلەردى داستۇرگە اينالدىرساق.

ەلدە سۇرلەنگەن بويداقتار مەن كارى قىزدار كوبەيگەن. سايكەسىنشە، نەكەگە تۇرۋ جاعى دا كەمشىن. ون جىل بۇرىن جىلىنا 160 مىڭنان اسا وتباسى شاڭىراق كوتەرسە، قازىر ول كورسەتكىش 40 مىڭعا از. بويداقتاردىڭ دەنى الماتى، قاراعاندى، شىعىس قازاقستان وبلىستارىندا تۇرادى.

شىنار تورەشوۆا، دەموگراف:

- قوعامنىڭ ساپاسىنىڭ، ءومىر ساپاسىنىڭ ارتۋى مەديتسينادا، جالپى الەۋمەتتىك-ەكونوميكالىق دامۋ، ءومىر ساپاسىنىڭ ارتۋى، ءوزىنىڭ دەنساۋلىعىنا ادامنىڭ، ءوزىنىڭ قارا باسىنا كوبىرەك ءمان بەرە باستايدى. سول ۋاقىتتاعى ءومىر ءسۇرۋ جاسى ۇزارادى جانە ادامداردىڭ جاناعى تۋۋ پروتسەسى دەيمىز، نەكەگە تۇرۋ پروتسەسى بۇلاردىڭ ءبارى كەشىگەدى.

دەموگراف، ءبىر ەسەپتەن ادامنىڭ ءومىر ءسۇرۋ جاسى ۇزارعان دەيدى. ءبىراق، قايدام. ويتكەنى وتباسىنداعى بالا سانى ازايعان. ال بۇرىڭعىنىڭ قازاقتارى تۇڭعىشبايى مەن تۇڭعىشبيكەسىن 15-16 جاستا ومىرگە اكەلەتىن. قازىر قازاقستاندىقتار ءبىرىنشى بالاسىن 29 جاسقا كەلىپ جوسپارلايدى ەكەن. بۇيتە بەرسەك، ەلدەگى دەموگرافيالىق ءوسىم تۇرالاۋى مۇمكىن. ال الپىسباي، جەتپىسبايلار جوقتىڭ قاسى.

اۆتورلارى: شەرنياز جالعاسبەك ۇلى، باعدات قايىركەن

www.24.kz