ەلدە ءۇش اۋىسىمدى مەكتەپتەردىڭ ۇلەسى قانشا

استانا. KAZINFORM - ءۇش اۋىسىمداعى، اپاتتى جاعدايداعى مەكتەپتەر ەلىمىزدىڭ قاي وڭىرلەرىندە كوپ كەزدەسەدى؟ بيىل ەل اۋماعىندا قانشا جاڭا مەكتەپ سالىنادى؟ بۇل سۇراقتارعا ق ر وقۋ-اعارتۋ مينيسترلىگى جاۋاپ بەردى.

- مەملەكەت باسشىسىنىڭ تاپسىرماسىنا سايكەس، 2019 -جىلدان بەرى 1 ميلليوننان استام وقۋشىعا ارنالعان 1200 مەكتەپ سالىندى. وسى شارالاردىڭ ناتيجەسىندە ەلىمىزدەگى ءۇش اۋىسىمدى مەكتەپتەردىڭ سانى 4 ەسە، اپاتتى مەكتەپتەردىڭ سانى 2 ەسە ازايدى، ال وقۋشى ورىندارىنىڭ تاپشىلىعى 4 ەسە قىسقاردى. قازىرگى كەزدە 8 مىڭنان استام مەكتەپ جۇمىس ىستەپ تۇر، ولاردىڭ شامامەن 1 پايىزى ءۇش اۋىسىمدى مەكتەپتەر. بۇل مەكتەپتەردىڭ باسىم بولىگى الماتى وبلىسىندا ورنالاسقان، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.

ۆەدومستۆو اقپاراتىنا قاراعاندا، وقۋشى ورىندارىنىڭ تاپشىلىعى، ءۇش اۋىسىمدى وقىتۋ جانە اپاتتى مەكتەپتەر ماسەلەسىن شەشۋ، سونداي-اق قالالار مەن اۋىلدار اراسىنداعى ءبىلىم بەرۋ ينفراقۇرىلىمى ساپاسىنىڭ ايىرماشىلىعىن تومەندەتۋ ماقساتىندا ەلىمىزدە جاڭا نىسانداردى سالۋ مەن رەنوۆاتسيالاۋ بويىنشا ءبىرقاتار باستاما قارقىندى ىسكە اسىپ جاتىر. وسى ورايدا بيىل 50 مىڭ وقۋشى ورنىنا ارنالعان 92 جاڭا مەكتەپ سالۋ جوسپارلانعان.

ايتا كەتەيىك بۇعان دەيىن قازاقستاندا سالىنعان جايلى مەكتەپتەردىڭ كەيبىرى نەگە پايدالانۋعا بەرىلمەگەنىن جازعان ەدىك.