ەلدە ەڭبەك كىتاپشاسى كىمگە جانە نە ءۇشىن قاجەت
استانا. KAZINFORM - بۇگىندە ەڭبەك كىتاپشاسى قاجەت پە؟ زەينەتاقىنى ەسەپتەۋ ءۇشىن ەڭبەك ءوتىلىن كىم جانە قالاي راستاۋى ءتيىس؟
زەينەت جاسىنا جاقىنداعان ازاماتتار ءۇشىن ەڭبەك كىتاپشاسىنىڭ قاجەتتىلىگى تۋرالى سۇراق وزەكتى بولىپ قالا بەرمەك.
قازىرگى تاڭدا ەڭبەك ءوتىلى ەلەكتروندى فورماتتا تىركەلەدى، الايدا كەيبىر جاعدايلاردا قاعاز قۇجاتتار دا ماڭىزدى ءرول اتقارادى. الەۋمەتتىك كودەكستىڭ نورمالارىنا سايكەس، ەڭبەك ءوتىلى ەڭبەك كىتاپشاسىمەن راستالادى.
- ەگەر ەڭبەك كىتاپشاسى بولماسا نەمەسە وندا قاجەتتى جازبالار جوق بولسا، ەڭبەك ءوتىلى جۇمىس تۋرالى مالىمەتتەردى راستايتىن قۇجاتتارمەن نەمەسە سوت شەشىمىمەن بەلگىلەنەدى. ەڭبەك كودەكسىنە سايكەس، ەڭبەك قىزمەتىن راستاۋ رەتىندە مىندەتتى زەينەتاقى جارنالارىنىڭ تۇراقتى اۋدارىمدارىن كورسەتەتىن جەكە زەينەتاقى شوتىنان الىنعان ءۇزىندى دە قابىلدانادى، - دەلىنگەن ب ج ز ق مالىمەتىندە.
2021 -جىلدىڭ 1- قاڭتارىنان باستاپ قازاقستاندا ەڭبەك قىزمەتىنىڭ ەلەكتروندىق ەسەبى ەنگىزىلدى.
- ەڭبەك شارتتارىنىڭ جاسالۋى مەن بۇزىلۋى تۋرالى بارلىق مالىمەت ءبىرىڭعاي ەڭبەك شارتتارىن ەسەپكە الۋ جۇيەسىنە اۆتوماتتى تۇردە تۇسەدى. ەڭبەك كىتاپشاسىن ساقتاۋ قاجەت پە؟ جوعارىدا ايتىلعانداي، ەڭبەك كىتاپشاسى بازالىق جانە ىنتىماقتى زەينەتاقى تولەمدەرىن ەسەپتەۋ ءۇشىن ەڭبەك ءوتىلىن راستاۋعا قاجەت بولۋى مۇمكىن، - دەلىنگەن حابارلامادا.
ايتا كەتەلىك قاعاز نۇسقاداعى ەڭبەك كىتاپشالارى مىندەتتى مە دەگەن ساۋالعا مينيستر جاۋاپ بەرگەن ەدى.
