ەلدە بازار سانى ازايدى

استانا. قازاقپارات -  2025 -جىلدىڭ قورىتىندىسى بويىنشا ەلىمىزدە 588 بازار جۇمىس ىستەيدى، 2024 -جىلعا قاراعاندا بازار سانى 38-گە ازايعان. بۇل تۋرالى ۇلتتىق ستاتيستيكا بيۋروسى حابارلادى.

ولاردىڭ باسىم بولىگى قالالىق جەرلەردە ورنالاسقان (417)، اۋىلدىق جەرلەردە - 171 بازار.

بازار سانى بويىنشا ءتىزىم باسىندا تۇركىستان وبلىسى تۇر - 103، ودان كەيىن الماتى وبلىسى - 57 مەن اقتوبە وبلىسى - 53. ساۋدا بازارى ۇلىتاۋ وبلىسىندا ەڭ از - 6 بازار.

بازارداعى ساۋدا ورىندارىنىڭ سانى دا ءبىر جىل ىشىندە ازايىپ، 147,6 مىڭعا جەتتى (2024 -جىلى - 150,8 مىڭ).

وڭىرلىك بولىنىستە ساۋدا ورىندارىنىڭ ەڭ كوپ سانى الماتى قالاسىندا تىركەلگەن (26,5 مىڭ)، العاشقى ۇشتىكتە، سونداي-اق، جامبىل (19,8 مىڭ) مەن الماتى وبلىستارى دا بار (17,2 مىڭ).

جالپى بازار سانىنىڭ ىشىندە 265 بازار زاڭدى تۇلعالارعا تيەسىلى بولسا، 323 بازار دارا كاسىپكەرلەردىڭ يەلىگىندە.

588 بازاردىڭ 9 كوممۋنالدىق، 323 جابىق بازارعا جاتادى. ساتىلاتىن تاۋار تۇرىنە قاراي 222 بازار مامانداندىرىلعان، ال 366 - امبەباپ.

ساۋدا كولەمى بويىنشا 39 بازار كوتەرمە، 549 بازار بولشەك ساۋداعا ارنالعان.

ايتا كەتەلىك الماتىدا «بايسات» بازارى ءۇشىنشى رەت ساتىلىمعا شىعارىلعانى تۋرالى جازعان ەدىك.