ەلدە اۋىل شارۋاشىلىعى ساناعى باستالدى

استانا. KAZINFORM - بۇگىننەن باستاپ قازاقستاندا ۇلتتىق اۋىل شارۋاشىلىعى ساناعى باستالدى. ساناق كەزىندە جينالعان دەرەكتەر ەلىمىزدەگى اۋىل شارۋاشىلىعىنىڭ قازىرگى جاعدايىن، ونىڭ قالاي دامىپ كەلە جاتقانىن، ونداعى حالىقتىڭ تۇرمىسىن كورسەتەدى.

العاشقى ونلاين-كەزەڭ 31-تامىزعا دەيىن جالعاسادى. قاتىسۋ ءۇشىن sanaq.gov.kz سايتىندا ە س ق، SMS-كود نەمەسە eGovMobile قوسىمشاسىنداعى QR-كود ارقىلى جۇيەگە كىرۋگە بولادى.

سايتتا ەكى ءتۇرلى ساۋالناما قولجەتىمدى: بىرەۋى - اگروكاسىپورىندارعا، ەكىنشىسى - باۋ-باقشاسى بار نە مال ۇستايتىن ءۇي شارۋاشىلىقتارىنا ارنالعان. سۇراقتار اۋىل شارۋاشىلىعى قىزمەتىنىڭ بارلىق تۇسىن قامتيدى: جەر مەن تەحنيكانى پايدالانۋ، ەڭبەك رەسۋرستارى، اۋىل شارۋاشىلىق ءونىمىن وتكىزۋ جانە ت. ب.

- سايتتا ساۋالنامانى قالاي تولتىرۋ كەرەكتىگى تۋرالى بەينەنۇسقاۋلىق، ينتەراكتيۆتى كومەكشى جانە ناقتى ۋاقىت رەجيمىندە سۇراقتارعا جاۋاپ بەرەتىن SANAQ مىرزا چات-بوتى جۇمىس ىستەيدى.

ينتەرنەتكە قوسىلماعان ازاماتتار ءۇشىن ەلىمىز بويىنشا اكىمدىكتەر مەن اۋداندىق ستاتيستيكا بولىمدەرىندە 2684 وزىنە-ءوزى قىزمەت كورسەتۋ پۋنكتى اشىلعان. سونداي-اق 1446 نومىرىندەگى بايلانىس ورتالىعى تاۋلىك بويى جۇمىس ىستەيدى جانە تەحنيكالىق سۇراقتاردان باستاپ ساۋالنامانىڭ مازمۇنىنا دەيىن كەز كەلگەن ماسەلە بويىنشا كەڭەس بەرۋگە دايىن، - دەلىنگەن ۇلتتىق ستاتيستيكا بيۋروسى حابارلاماسىندا.

ۇلتتىق ستاتيستيكا بيۋروسى اۋىل شارۋاشىلىعى ساناعىنا قاتىسۋشىلار ۇسىنعان بارلىق دەرەكتىڭ زاڭمەن قورعالاتىنىن جانە سالىق ورگاندارىنا، پوليتسياعا نەمەسە باسقا مەملەكەتتىك مەكەمەلەرگە بەرىلمەيتىنىن حابارلايدى.