لايك باسپاعانداردى جازالاعان شىمكەنتتەگى جاستار ورتالىعىنىڭ باسشىسى قىزمەتىنەن كەتتى

شىمكەنت. KAZINFORM - مارات سپاتايەۆ شىمكەنت قالاسىنىڭ جاستار رەسۋرستىق ورتالىعى باسشىلىعىنان بوسادى. بۇل تۋرالى ول الەۋمەتتىك جەلىدە جازبا قالدىردى.

مارات سپاتايەۆ جازباسىندا ءوز ارىپتەستەرىنە، باسشىلىققا جانە سەرىكتەستەر بولعان ازاماتتارعا العىس ءبىلدىرىپ، جاستارمەن جۇمىس ىستەۋدىڭ وزىنە ومىرلىك ۇستانىم بولعانىن اتاپ ءوتتى.

- بۇل مەن ءۇشىن ءومىرىمنىڭ ماڭىزدى، جاۋاپتى ءارى ەرەكشە كەزەڭدەرىنىڭ ءبىرى بولدى. وسى سالادا جۇزەگە اسقان ءاربىر جوبا مەن اتقارىلعان ءاربىر ءىس مەن ءۇشىن اسا قۇندى. ءبىر جىل ىشىندە جاناشىرلىق تانىتىپ، شىنايى قولداۋ بىلدىرگەن بارلىق ازاماتتارعا ەرەكشە ريزاشىلىعىمدى بىلدىرەمىن. الداعى ۋاقىتتا دا شىرايلى شىمقالامىزدىڭ گۇلدەنۋىنە بىرگە اتسالىسامىز دەگەن ۇمىتتەمىن، - دەپ جازدى ول.

سونداي- اق، مارات سپاتايەۆ جاستاردىڭ بولاشاعىنا ۇلەس قوسۋ باعىتىنداعى ىزدەنىسى مەن ەڭبەگى جالعاسا بەرەتىندىگىن جەتكىزدى.

- ەكس- ارىپتەستەرىمە ايتارىم - ءوز باسىم ەشقاشان «مەن باستىق، سەن اقىماقسىڭ» دەيتىن «كەڭەستىك كوزقاراستا» بولعان جوقپىن. الداعى ۋاقىتتا جولىمىز توعىسىپ جاتسا، سىيلاستىقتا بولايىق. ءومىر وتكىنشى، ال شىنايى سىيلاستىق - ماڭگىلىك، - دەدى ول.

ايتا كەتەيىك، بۇدان بۇرىن شىمكەنتتە جاستار ورتالىعىنىڭ باسشىسى جەلىدەگى جازباعا لايك باسپاعان قىزمەتكەرلەردى جازالاعانىن جازعان بولاتىنبىز.

ءتىپتى، جينالىسقا سالىپ، بۇيرىق شىعارىپ، ەسكەرتۋ بەرگەن. سالدارىنان ءبىر قىزمەتكەردىڭ دەنساۋلىعى ناشارلاپ، جەدەل جاردەم شاقىرتۋعا ءماجبۇر بولعان.

اۆتور

قايرات زاينيشيەۆ