لاتۆيا دەپۋتاتتارىنا ورىس تىلىندە سويلەسۋگە تىيىم سالىندى

استانا. KAZINFORM - لاتۆيا سەيمى (پارلامەنت) دەپۋتاتتارعا كەڭسە عيماراتتارىندا ورىس ءتىلىن قولدانۋعا تىيىم سالاتىن جانە ولاردى لاتىش تىلىندە سويلەۋگە ماجبۇرلەيتىن تۇزەتۋلەردى قابىلدادى. بۇل تۋرالى ISM پورتالى حابارلادى.

پارلامەنت عيماراتىندا دەپۋتاتتاردان تەك مەملەكەتتىك ءتىل - لاتىش ءتىلىن عانا قولدانۋ تالاپ ەتىلەدى. جاڭا نورمالار دەپۋتاتتاردىڭ ءوزارا قارىم- قاتىناسىنا دا، ولاردىڭ ازاماتتارمەن قارىم-قاتىناسىنا دا قاتىستى.

سەيم عيماراتتارىندا باسقا تىلدەردى قولدانۋ زاڭ بۇزۋشىلىق رەتىندە قاراستىرىلاتىنى اتاپ ءوتىلدى.

سونداي-اق، تۇزەتۋ ءتىل نورماسىنان بولەك، توتەنشە جاعدايلاردا نەمەسە وزگە دە ەرەكشە جاعدايلاردا دەپۋتاتتاردىڭ پارلامەنت كوميتەتتەرىنىڭ وتىرىستارىنا قاشىقتىقتان قاتىسۋ مۇمكىندىگىن قاراستىرادى. مۇنداي قاتىسۋ كوميسسيا توراعاسىمەن الدىن الا كەلىسىلۋى شارت. وتىرىسقا ءتوراعا ءوزى قاتىسۋى كەرەك.

سونداي-اق زاڭعا دەپۋتاتتاردى قىلمىستىق جاۋاپكەرشىلىككە تارتۋعا قاتىستى دا تۇسىندىرمەلەر قوسىلدى. اتاپ ايتقاندا، قىلمىستىق ءىس دەپۋتات قىزمەتىنە كىرىسكەنگە دەيىن قوزعالسا دا، ەندى قىلمىستىق قۋدالاۋدى جالعاستىرۋ ءۇشىن سەيمنىڭ كەلىسىمى قاجەت.

بۇعان قوسا، لاتۆيا ۇكىمەتى رەسەيلىك Telegram ارنالارىنىڭ بارلىعىن جاۋىپ تاستاعىسى كەلەتىنى بەلگىلى بولدى. ولار بۇل شارانى رەسپۋبليكا كولەمىندە ورىس ءتىلىنىڭ تارالۋىنا قارسى كۇرەسۋ قاجەت دەپ تۇسىندىرەدى.

ەسكە سالا كەتەيىك، لاتۆيا مەن ەستونيا جاياۋ اسكەرگە قارسى مينالاردى پايدالانۋعا تىيىم سالاتىن كونۆەنسيادان شىعادى.