لاگەردە بالانىڭ سوققىعا جىعىلۋىنا بايلانىستى تالىمگەر قىزمەتىنەن بوساتىلدى
ورال. KAZINFORM - ورالدا «اتامەكەن» قالالىق بالالار- جاسوسپىرىمدەر تۋريزمى جانە ەكولوگيا ورتالىعىندا بالانىڭ سوققىعا جىعىلۋىنا بايلانىستى تالىمگەر قىزمەتىنەن بوساتىلدى.
بالانىڭ اكەسى الەۋمەتتىك جەلىدە جازعانىنداي، 10 جاسار ۇلى لاگەردە 5 كۇن بولعاندا، ءۇش كۇن بويى تاياق جەگەن.
ب ق و پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتكەنىندەي، اتالعان دەرەك 15-ماۋسىم كۇنى ورال قالاسى پوليتسيا باسقارماسىندا تىركەلگەن.
«سونىڭ اياسىندا پوليتسيا قىزمەتكەرلەرى وقيعاعا قاتىسى بار ادامداردى جانە جانجالدىڭ شىعۋ سەبەپتەرىن انىقتاۋ ماقساتىندا ءىس-شارالار جۇرگىزدى. قازىرگى كەزدە سوت-مەديتسينالىق ساراپتاما تاعايىنداۋ تۋرالى قاۋلى شىعارىلدى. سونىڭ قورىتىندىسى نەگىزىندە وقيعاعا زاڭدىق باعا بەرىلەدى. تەكسەرۋدى ۇيىمداستىرۋ ماقساتىندا ورال قالاسى ءبىلىم بەرۋ ءبولىمى اتىنا ۇيعارىم بەرىلدى»، دەپ حابارلادى ۆەدومستۆودان.
ب ق و ءبىلىم باسقارماسىنىڭ ناقتىلاۋىنشا، كامەلەتكە تولماعاندار اراسىندا تاربيە جۇمىستارىن دۇرىس جۇرگىزبەگەنى ءۇشىن وترياد ۆوجاتىيى مەن تاربيەشىگە تارتىپتىك شارا قولدانىلدى. ۆوجاتىي قىزمەتىنەن بوساتىلدى. ورال قالاسى ءبىلىم بەرۋ ءبولىمىنىڭ بۇيرىعىمەن قىزمەتتىك مىندەتىن ورىنداۋ بارىسىندا سالعىرتتىققا جانە جازعى لاگەردە ىشكى ءتارتىپ ەرەجەلەرىن ساقتاۋ مەن بالالار قاۋىپسىزدىگىن قامتاماسىز ەتۋدە كەمشىلىكتەرگە جول بەرگەنى ءۇشىن «اتامەكەن» قالالىق بالالار-جاسوسپىرىمدەر تۋريزمى جانە ەكولوگيا ورتالىعىنىڭ ديرەكتورىن مىندەتىن اتقارۋشى سوگىس تۇرىندەگى تارتىپتىك جاۋاپكەرشىلىككە تارتىلدى.
اۆتور
عايساعالي سەيتاق
