ۇلاربەك نۇرعالىم ۇلى: «التىن ادام» انيماتسيالىق فيلمنىڭ كورەرمەنگە بەرەر دۇنيەسى مول
استانا. KAZINFORM - ەلىمىزدىڭ بارلىق كينوتەاترىنان 5 - ماۋسىمنان باستاپ «التىن ادام» انيماتسيالىق فيلمى كورسەتىلە باستادى.
Jibek Joly ارناسىنىڭ «بۇگىن LIVE» باعدارلاماسىنا قوناق بولعان ءتۇسىرىلىم توبىنىڭ مۇشەلەرى بارشا قازاقستاندىقتى وتاندىق ءونىمدى قولداۋعا شاقىردى.
- كورەرمەن فيلمدى وتە ىستىق قابىلداپ جاتىر. فيلم شىقپاس بۇرىن بالالار مەن اتا-انالارعا ارنايى كورسەتتىك. ماتىنمەن جۇمىس ىستەۋ بارىسىندا دا كوپتەگەن ماسەلەگە دەن قويىلدى. وسى ءساتتى پايدالانا وتىرىپ، بارلىق اتا-اناعا دەمالىس ۋاقىتىندا بالالارىن وسى فيلمگە اپارۋعا شاقىرامىن. وسىنداي قۇندى، تاريحي دۇنيەلەردى كورسەتىپ، وسكەلەڭ ۇرپاقتى تاربيەلىك ءمانى بار دۇنيەلەرمەن سۋسىنداتايىق دەپ ايتقىم كەلەدى. «وتان وتباسىدان باستالادى» دەيمىز عوي. بالالار وزدەرى بيلەت الىپ، كينوتەاترلارعا بارا المايدى عوي. سوندىقتان اتا-انالار تاراپىنان وسى دۇنيەگە دەن قويىلىپ، ۇلتتىق فيلمدەردى وتاندىق پروكاتتا قولداسا دەيمىن، - دەدى ۇلتتىق كينونى قولداۋ مەملەكەتتىك ورتالىعى باسقارما ءتوراعاسىنىڭ ورىنباسارى ادىلەت وماروۆ.
ال سەناريست ۇلاربەك نۇرعالىم ۇلى انيماتسيالىق فيلمنىڭ كورەرمەنگە بەرەرى مول دەيدى.
- سەناري جازىلار كەزدە قازىرگى بالالاردىڭ تۇسىنىگى دە ەسكەرىلەدى. العاشقى كورسەتىلىم بولعاندا سول بالالاردىڭ اسەرىن باقىلادىق. بۇل انيماتسيالىق فيلمنىڭ كورەرمەنگە بەرەر دۇنيەسى مول دەپ ويلايمىن. بۇل جاي عانا ويىن-كۇلكىنىڭ اينالاسىنداعى دۇنيە ەمەس. ءبىز قازىر «بالا عوي» دەپ وتە جەڭىل دۇنيەلەردى كورسەتىپ جاتقان سەكىلدىمىز. ال نەگىزى بالالاردىڭ وسىنداي ءوسۋ كەزەڭىندەگى ويلاۋ دەڭگەيى مۇلدەم باسقاشا بولادى. ءتىپتى، بىزدە كۇنىگە سوزدىك قور 1-2 سوزگە عانا تولىعىپ وتىرۋى مۇمكىن، ءبىراق بالالاردا جۇزدەگەن ءسوز قوسىلىپ وتىرادى. بالالاردىڭ دامۋىندا ەرەكشە جىلدامدىق بار. سونى ەسكەرە وتىرىپ، وسى فيلمدە سالماقتىراق دۇنيەلەردى قوسۋعا تىرىستىق، - دەيدى ول.
«التىن ادام» انيماتسيالىق فيلمىنىڭ سەناري اۆتورى بالالارعا ارنالعان فيلمنىڭ سەناريىن جازۋ قيىن ەكەنىن ايتادى.
- جالپى بالالارعا سەناري جازۋ وتە قيىن. كەي نارسەنى تارقاتىپ، ءتۇسىندىرىپ جازۋ كەرەك. ەرەسەك ادامدار ونداي دۇنيەلەردى وڭاي تۇسىنە بەرەدى عوي. ءبىز بۇل فيلمگە سەناريدى رەجيسسەرمەن بىرگە جازدىق. رەجيسسەر - تۇردىبەك مايدان. يدەيا دا سول كىسىنىكى. سەناري جازار الدىن مەن ودان: «نە وي ايتقىڭ كەلەدى، نە كورسەتكىڭ كەلەدى؟» - دەپ سۇرادىم. سوندا ول: «ءبىز التىن ادامنىڭ سىرتىن بىلەمىز، مەن سول التىن ادامنىڭ ءىشىن كورسەتكىم كەلەدى»، - دەدى. سول نارسە مەنىڭ كوڭىلىمە قوندى. سودان سوڭ باس كەيىپكەردىڭ جان دۇنيەسىنە باتىرلىق، پاراساتتىلىق، ادىلەتتىلىك جانە ىزگىلىك دەگەن 4 قاسيەتتى قوستىق تا، سول تورتەۋى ءتورت جەبە بولدى. باستى كەيىپكەر قاعان بولعان كەزدە ونىڭ قولىندا 3 جەبە بولدى. سولاي ول قالعان ىزگىلىك دەگەن 1 جەبەنى ىزدەيدى. فيلمدە سول ىزدەۋ بارىسىنداعى قاعاننىڭ باستان كەشكەن قيىندىقتارى كورسەتىلەدى، - دەيدى سەناريست ۇلاربەك نۇرعالىم ۇلى.
جاقىندا عانا تۇساۋى كەسىلگەن تۋىندىنى كورەرمەنگە ۇسىنۋ ءۇشىن 100 گە تارتا مامان قىزمەت ەتىپتى.
- انيماتسيا - بۇل باسقا سالالاردان ەرەكشە. ونىڭ ءوندىرىسى دە وتە ۇزاق ۋاقىتتى تالاپ ەتەدى. ول جاقتا ماماندار، جالپى ايتقاندا، زەرگەرلىك جۇمىسپەن اينالىسادى. ءار كەيىپكەردى زەردەلەپ سالىپ وتىرۋ، ءار كەيىپكەردىڭ قيمىلىن ءاربىر سەكۋندقا سايكەستەندىرۋ - بۇل ۇلكەن قاجىرلى ەڭبەكتى تالاپ ەتەدى. سۋرەتشىلەر، انيماتورلار، رەجيسسەرلەر سىندى جالپى وندىرىستە 70 شاقتى ادام جۇمىس ىستەدى. ودان بولەك تاعى 30-عا جۋىق مامان دۋبلياجبەن اينالىستى. دۋبلياجعا كاستينگ ۇلكەن بولدى. ويتكەنى بالانىڭ داۋىسىن، ءاربىر قيمىلىن بەرۋ وتە قيىن. بۇل جەردە باستى ءرولدى رەجيسسەردىڭ ۇلى ايماۋىت دىبىستايدى. ساۋندترەكتى دە وسى بالا ورىندادى. مۋلتفيلمنىڭ ساۋندترەگى دە وتە ءساتتى شىققان. كەشە دە كورەرمەندەر: «قايدان تىڭداساق بولادى، بۇل ءان قاي پلاتفورمادا بار؟» - دەپ سۇراپ جاتىر. بۇل فيلمنىڭ كورەرمەن اراسىندا دا تارالۋىنا كوپ ۇلەس قوسادى، - دەيدى ۇلتتىق كينونى قولداۋ مەملەكەتتىك ورتالىعى باسقارما ءتوراعاسىنىڭ ورىنباسارى.
ماماننىڭ ايتۋىنشا، فيلم تەك قازاقستان اۋماعىندا ەمەس، الىس-جاقىن شەت ەلدەردە دە دارىپتەلمەك.
- وسى كينوتەاترلارداعى پروكاتتان كەيىن ءبىز تەلەارنالاردا مىندەتتى تۇردە كورسەتەمىز. ءبىزدىڭ ۇلتتىق كينو ورتالىعىنىڭ كينوپويسك- تە ارنايى سورەسى پايدا بولدى. سونداي ستريمينگتىك پلاتفورمالاردا دا جاريالانادى. قازىر ءتۇرلى پلاتفورمالاردان بىزگە كوپتەگەن ۇسىنىس كەلىپ جاتىر. سوعان وراي ءبىز بۇل جوبانى تەك قازاقستانعا ەمەس، شەت مەملەكەتتەرگە دە دارىپتەۋگە بار كۇشىمىزدى سالامىز، - دەيدى ادىلەت وماروۆ.
اۆتور
ارۋجان ماحمۋت
