ۇلاربەك دالەي ۇلىنىڭ «قارعىباۋلى قاسقىرى» وقىرمانعا جول تارتتى
اقىن، جازۋشى ۇلاربەك دالەي ۇلىنىڭ «قارعىباۋلى قاسقىر» اتتى سۋ جاڭا حيكايالار جيناعى جارىق كوردى. اتالعان كىتاپتىڭ تۇساۋكەسەرى استاناداعى ۇلتتىق اكادەميالىق كىتاپحانادا ءوتتى، دەپ حابارلايدى Kazinform.
جازۋشىنىڭ «قارعىباۋلى قاسقىر» اتتى بۇل كىتابىندا ەكى الىپ يمپەريانىڭ ورتاسىندا، قىسپاقتا عۇمىر كەشكەن قازاقتاردىڭ وتكەن عاسىر ورتاسىنداعى تايتالاسقا تولى اۋىر تاعدىرى، ارعى بەت قازاقتارىنىڭ باسقىنشىلارعا قارسى جۇرگىزگەن قيانكەسكى سوعىستارى ەرلىك، رۋح تىلىمەن تاماشا باياندالادى.
جايشىلىقتا مال باۋىزداۋعا دا ءداتى بارمايتىن ءبيازى، مومىن جىگىتتەردىڭ ەل شەتىنە جاۋ تيگەندە قانداي سۇراپىل قاھارماندارعا، داڭقتى مەرگەندەرگە اينالعانىن وقىپ تاڭ قالاسىز.
اۆتوردىڭ ايتۋىنشا، ونىڭ بۇل كىتاپتى جازۋداعى ماقساتى - قازىرگى سان تاراۋعا بولىنگەن ءقوعامدى بىرىكتىرۋ، سونداي- اق ءوسىپ كەلە جاتقان جاس جىگىتتەردىڭ نامىس جىگەرىن وياتۋ بولعان.
«مەنىڭ باستى ماقساتىم - ءوزىنىڭ ۇلتتىق رۋحىنان اداسىپ، سانا ءتۇرلى باعىتقا ءبولىنىپ بارا جاتقان زامانداستارىمنىڭ باسىن بىرىكتىرۋگە ۇمتىلۋ. سونىمەن قاتار، ءوسىپ كەلە جاتقان جاس ۇرپاقتىڭ ۇلتتىق ساناسىنا سىلكىنىس جاساۋ بولاتىن. سول ءۇشىن وتكەن عاسىردا ارعى بەتتەگى قازاقتاردىڭ جاۋمەن كۇرەسۋدەگى ەرەكشە ەرلىكتەرىن تاريحي دەرەكتەرگە سۇيەنە وتىرىپ جازىپ شىقتىم. وسى الدىعا قويعان جوسپارىم ورىندالدى دەپ ويلايمىن، ويتكەنى كىتاپتى وقىعان بارلىق وقىرماندارىم جوعارى باعاسىن بەرىپ جاتىر»، دەيدى، اقىن، جازۋشى ۇلاربەك دالەي ۇلى.
ايتا كەتەيىك، اتالعان كىتاپتىڭ تۇساۋكەسەرىنە ءماجىلىس دەپۋتاتتارى اقىن قازىبەك يسا مەن ابزال قۇسپان قاتىستى.
باسپادان شىعا سالا-اق قالىڭ وقىرماننىڭ نازارىن اۋدارعان وسىناۋ كىتاپ رەسپۋبليكا كولەمىنە كەڭىنەن تاراۋدا.
كىتاپتى kaspi.kz، «مەلومان» كىتاپ دۇكەندەرىنەن تابۋعا بولادى.
كىتاپ جانرى - تاريحي، تانىمدىق ادەبيەت. حيكايا بويىنداعى بارلىق وقيعالار تاريحي دەرەكتەر نەگىزىندە قاعازعا تۇسكەن.
اتا- بابالارىمىز كوك تۇرىكتەر توتەم ەتكەن قاسقىر وبرازى ارقىلى كوشپەندىلەر ۇرپاعى - بۇگىنگى قازاقتىڭ قانىنداعى باتىرلىق گەنىن وياتۋدى ماقسات تۇتقان.
جاس بۋىندى قاسقىرداي قايسار، بيىك رۋحتى، نامىستى، ار-ۇجداندى ەتىپ تاربيەلەۋدە تاپتىرماس وقۋ قۇرالى.
اۆتورى بەيسەن سۇلتان ۇلى
