ەل ىشىندە جوعارى قۇقىقتىق مادەنيەت قالىپتاسىپ كەلەدى - سەناتور

استانا. KAZINFORM - ەلىمىزدە ازاماتتىق جاۋاپكەرشىلىك يدەولوگياسى بەرىك ورنىعا باستادى. بۇل پىكىردى سەنات دەپۋتاتى عالياسقار سارىبايەۆ ايتتى.

- مەملەكەت باسشىسى قاسىم-جومارت توقايەۆ قۇقىق قورعاۋ ورگاندارىنىڭ كەڭەيتىلگەن القا ماجىلىسىندە ءسوز سويلەدى. سوڭعى جىلدارى ەلىمىزدە بارلىق سالادا اۋقىمدى رەفورمالار جاسالىپ جاتىر. مەملەكەتتىڭ ساياسي جۇيەسى مەن ەكونوميكالىق قۇرىلىمى تۇبەگەيلى جاڭعىرۋدا. ەل ىشىندە جوعارى قۇقىقتىق مادەنيەت قالىپتاسىپ كەلەدى. ازاماتتىق جاۋاپكەرشىلىك يدەولوگياسى بەرىك ورنىعا باستادى، - دەدى ع. سارىبايەۆ.

وسى ورايدا ول پرەزيدەنت قۇقىق قورعاۋ جۇيەسىن جەتىلدىرۋگە جانە بارلىق سالادا زاڭ مەن ءتارتىپ ورناتۋعا باسا ءمان بەرىپ وتىرعانىن اتاپ ءوتتى.

- 2019 -جىلدان بەرى قىلمىستىق قۇقىقبۇزۋشىلىق سانى شامامەن ەكى ەسە ازايدى. سونىڭ ىشىندە قاراقشىلىق، توناۋ، ۇرلىق پەن بۇزاقىلىق دەڭگەيى 4 ەسە تومەندەدى، ال كىسى ولتىرۋگە قاتىستى قىلمىستار 30 پايىزعا كەمىدى. قوعامدىق ورىندارداعى قىلمىس سانى 80 پايىزعا ازايدى. بۇل - ەلىمىز بەن جەرىمىز ازاماتتارىمىز ءۇشىن قاۋىپسىز ەكەنىن كورسەتەدى، - دەيدى سەناتور.

بۇدان بۇرىن حابارلانعانداي، قۇقىق قورعاۋ ورگاندارىنىڭ كەڭەيتىلگەن القا ماجىلىسىندە پرەزيدەنت ەلىمىزدە «زاڭ مەن ءتارتىپتىڭ» قاتاڭ ساقتالۋىنا قوعام وكىلدەرىنىڭ قوسار ۇلەسى دە وراسان زور ەكەنىن اتاپ ءوتتى.

مەملەكەت باسشىسى قاسىم-جومارت توقايەۆ قۇقىق قورعاۋ ورگاندارىنىڭ كەڭەيتىلگەن القا ماجىلىسىندە ادىلەتتى ءارى قاۋىپسىز قازاقستاندى قۇرۋ ءۇشىن زاڭ مەن ءتارتىپ ۇستەمدىگىن تۇبەگەيلى ورنىقتىرۋ كەرەك ەكەنىن ايتتى.

اۆتور

رۋسلان عابباسوۆ