ەل تاەكۆوندوشىلارى پاراليمپيادانىڭ 3 ليتسەنزياسىنا يە بولدى

قازاقستاندىق سپورتشىلار پاراتاەكۆوندادان فرانسيادا وتەتىن پاريج وليمپياداسىنىڭ 3 ليتسەنزياسىنا قول جەتكىزدى، دەپ حابارلايدى Kazinform.

تۋريزم جانە سپورت مينيسترلىگىنەن ءمالىم ەتكەندەي، پاراليمپيادانىڭ كۆاليفيكاتسيالىق رەگلامەنتىنە سايكەس K44 ساناتىندا 80 كەلىگە دەيىنگى سالماق دارەجەسىندە پاراتاەكۆوندوشىمىز نۇرلان دومبايەۆ، 80+ كەلى سالماقتا نىشان ءومىرالى جانە 57- كەلى سالماقتا كاميليا دوسمالوۆا بيىل پاريجدە وتەتىن باسەكەنىڭ جولداماسىنا يە بولعان.

سپورتشىلارىمىز الەمدىك رەيتينگتىڭ كورسەتكىشىنە سايكەس، توپ 20 ۇزدىك سپورتشىلار قاتارىنا كىرگەن.

بۇگىنگى كۇنگە دەيىن قازاقستاندىق پاراسپورتشىلاردا پاريج 2024 ويىندارىنىڭ 5 ليتسەنزياسى بار: پاراجەڭىل اتلەتيكا، پاراپاۋەرليفتينگ، ۆولەيبولدى وتىرىپ ويناۋ، پاراكانوە جانە پارا ءجۇزۋ.

ەسكە سالا كەتەيىك، 2020 -جىلعى توكيو پاراليمپياداسىندا قازاقستان ۇلتتىق قۇراماسىنان 25 سپورتشى 5 مەدال (1 التىن، 3 كۇمىس جانە 1 قولا) جەڭىپ الىپ، جالپى ەسەپتە 48-ورىنعا يە بولعان ەدى.

ايتا كەتەيىك، پاريج قالاسىندا XXXIII جازعى وليمپيادا وسى جىلدىڭ 26-شىلدەسى مەن 11-تامىزى ارالىعىندا وتسە، XVII جازعى پاراليمپيادا 28-تامىز - 8-قىركۇيەك ارالىعىندا وتەدى.