گۇل سىيلاۋدىڭ ءتارتىبىن بىلەسىز بە؟
استانا. قازاقپارات - گۇل سىيلاۋدىڭ دا ءتارتىبى، وزىندىك ءجون-جوسىعى بار. ولار الەمنىڭ بارلىق تىلىندە سويلەي الادى. ياعني، دۇرىس تاڭدالعان گۇل شوعى كوكەيىڭىزدەگى ويدى، ىزگى لەبىزىڭىزدى ءسوزسىز جەتكىزۋگە مۇمكىندىك بەرەدى.
ەڭ اۋەلى گۇلدىڭ ءتۇر-ءتۇسى عانا ەمەس، سانى دا ماڭىزدى ەكەنىن ايتا كەتكەن ءجون. ناقتى ايتساق، گۇل شوعىنداعى گۇلدەر سانى جۇپ سان ەمەس، تاق سان بولۋى كەرەك دەگەن سەنىم بار. پۇتقا تابىنۋ كەزەڭىندە جۇپ ساندار زۇلىمدىقتى، سونداي-اق ءومىر سيكلىنىڭ توقتاعانىن بىلدىرەدى دەپ ەسەپتەلگەن، بۇل سەنىم وسىدان قالعان دەگەن دەرەك بار.
كەلەسى ماسەلە، گۇلدىڭ ءتۇسى. قىزىل ءتۇس - ءومىردىڭ، كۇش پەن ماحابباتتىڭ ءتۇسى. قىزعىلت ءتۇس - نازىكتىك، سەزىم پەن قامقورلىقتىڭ ءتۇسى. گۇلدەر تىلىندە بۇل - تالعامپازدىقتىڭ، ريزاشىلىقتىڭ، جاناشىرلىقتىڭ سيمۆولى.
ال اق گۇلدەر تازالىقتى، ادالدىقتى بىلدىرەدى. اق ءتۇس جارىققا، جاڭا ومىرگە اپاراتىن جولدىڭ سيمۆولى بولسا، كوك ءتۇس - تىنىشتىق پەن قۇپيانىڭ ءتۇسى.
كوگىلدىر تۇستەس گۇل شوقتارىن جاقىن ادامدارعا قولداۋ ءبىلدىرۋ ءۇشىن سىيلاۋعا بولادى.
سارى - كۇننىڭ ءتۇسى. سارى گۇلدەر بايلىقتى، ساتتىلىك پەن قۋانىشتى بىلدىرەدى، سارى گۇلدەردى ساتتىلىك، جاقسى كوڭىل كۇي تىلەيتىن كەز كەلگەن ادامعا سىيعا تارتا الاسىز.
