ەل كەزىپ جۇرگەن جاياۋ مىسقىلدار

Ауыл
Фото: ҚазАқпарат

«وزدەرى دە بارادى عوي»

ءبىزدىڭ اۋىلدا سەكسەننىڭ سەڭگىرىنە شىققانشا توپقا كىرمەگەن، ۇيدەن ۇزاپ شىقپاعان قاراباي دەگەن كىسى بولدى. سويتە تۇرا ول كىسىنىڭ قاپەلىمدە ايتىپ قالعان كەيبىر جاياۋ مىسقىلدارى ەل كەزىپ جۇرەتىن.

ەشكىممەن شاتاعى جوق ءوز ۇيىندە تىنىش وتىرعان الگى بەيۋاز شالدى ءبىر كۇنى اۋرۋ دەيتىن الەم-جالەم پالەكەت «بيگە تارتىپتى». تارتقاندا دا جاي ەمەس، بەلىنەن قاپسىرا قۇشاقتاپ شىركوبەلەك اينالدىرعاندا اجال جارىقتىق شالەكەڭنىڭ كوز الدىنان جالاڭاياق جۇگىرىپ ءوتىپتى.

ءوزىنىڭ ەندى بۇ دۇنيەلىك ەمەس ەكەندىگىنە كوزى انىق جەتكەن قاراكەڭ ءبىر كۇنى كەمپىرىنە بۇرىلىپ: «ءاي كەمپىر، ساعات پا، كۇن بە و دۇنيەگە اتتاناتىن سەكىلدىمىن، ايتارىڭ بار ما؟» دەپتى. سوندا كەمپىرى ءبىر جاعى شالدىڭ كوڭىلىن كوتەرگەن بولىپ: «ويباي شال-اۋ، و دۇنيەگە نە ايتام، قايتا سەن ايت. كەتكەلى جاتقان ادامدار بۇ دۇنيەدە قالىپ بارا جاتقاندارعا وسيەت ايتپاۋشى ما ەدى؟ سەنىكى قاي قىلجاق؟» دەپتى. قارەكەڭ ىڭىرانىپ: «ە، ءبىر كوردەن شىعىپ، ءبىر كورگە كىرىپ بارا جاتقان مەن بەيباق نە وسيەت ايتىپ باستارىڭدى وڭعا قاراتار دەيسىڭ! ونىڭ ۇستىنە قالىپ بارا جاتقاندار قاشانعى قالا بەرەدى، وزدەرى دە بارادى عوي» -دەپ ءارى قاراي اۋناپ ءتۇسىپتى.

«ۇزىن قۇلاقتان ەستۋىمشە»

وسى قاركەڭنىڭ كورشىسى اقان دەگەن كىسى اناۋ-مىناۋ اڭگىمەسىن ايتىپ، شاي-تاماعىن ەلدەن ايىرىپ جۇرەتىن ادام ەدى. و كىسىنىڭ ءبىر ادەتى اڭگىمە ايتقاندا ىلعي دا «ۇزىن قۇلاقتان ەستۋىمشە» دەپ قوسىپ وتىرادى ەكەن. ءبىر كۇنى قاراباي كەشكى قويدان كەلسە، ۇيىندە اقان وتىرادى. ءۇي يەسى جايعاسىپ بولماي جاتىپ «ۇزىن قۇلاقتان ەستۋىمشە» دەپ ۇزىن-سونار اڭگىمەسىن سىدىرتا جونەلەدى. اش قارىنعا ايتىلعان وتىرىك اڭگىمە كەيدە ادامنىڭ اشۋىن تۋدىراتىنى بار ەمەس پە، قارەكەڭ اقاندى ۇناتپاي: «وسى ءسىز اڭگىمەلەرىڭىزدىڭ ءبارىن ەسەكتەن ەستىپ جۇرەسىز بە؟» دەپ قىجىرتقان ەكەن.

ۇلاربەك نۇرعالىم ۇلى

سوڭعى جاڭالىقتار