ۇلۋ جىلى تۋعان ۇلى تۇلعالار
ءار ون ەكى جىلدا ءبىر كەلەتىن ۇلۋ جىلىندا جانى جايساڭ، اقىلدى دا زەرەك ادامدار دۇنيەگە كەلەدى.
تاريحقا ءبىر كوز جۇگىرتسەك، بۇل جىلى تۋعان، ەرەن ەڭبەگىمەن ەستە قالعان ۇلى تۇلعالار وتە كوپ. ونىڭ بارلىعىن ءتىزىپ كورمەسەك تە، سونىڭ بىرنەشەۋىنە توقتالا كەتسەك.
ۇلۋ جىلى تۋعان ۇلى تۇلعالاردان ەڭ اۋەلى ايگىلى فيلوسوف، ماتەماتيك ومار حايام (1048)، اتاقتى جازۋشى، دەتەكتيۆ جانرىنىڭ نەگىزىن قالاۋشى ەدگار پو (1810)، ايگىلى قالامگەرلەر ليۋيس كەررولل (1832)، دج. ر. تولكيەن (1892)، يوسيف برودسكي (1940)، ماكسيم گوركيدى (1868) اتاپ وتۋگە بولادى.
ال الەمنىڭ جاراتىلىسى مەن تىلسىمىنا كوز تىككەن فيلوسوفتار اراسىنان فريدريح نيتسشە (1844)، فريدريح ەنگەلس (1820)، وسۆالد شپەنگلەر (1880)، جان- جاك رۋسسو (1712)، ايگىلى يممانۋيل كانت (1724) سىندى الىپتار بار.
ساياساتقا قاتىسى بارلاردىڭ اراسىندا وجەت قىز جاننا د’ارك (1412)، ورىس پاتشاسى نيكولاي II رومانوۆ (1868)، امەريكا پرەزيدەنتى اۆراام لينكولن (1810)، ەرنەستو چە گيەۆارا (1928)، رەسەي پرەزيدەنتى ۆلاديمير پۋتين (1952)، فرانسۋا ميتتەران (1916)، ەدۋارد شيەۆاردنادزەلەردى (1928) اتاۋعا بولادى.
سونداي- اق ۇلۋ جىلىندا قازاقتىڭ دا تالاي جايساڭى مەن جاقسىسى دۇنيەگە كەلگەن. اتاپ ايتساق، ەنتسيكلوپەديست- عالىم ءجۇسىپ بالاساعۇن (1016)، عۇلاما انەت بابا (1628)، قاراساي باتىر (1664)، شال اقىن (1748)، كۇيشى داۋلەتكەرەي شىعاي ۇلى (1820)، كۇيشى ابىل (1820)، قازاقتىڭ العاشقى رەجيسسەرى جۇمات شانين (1892)، ارحەولوگ- عالىم الكەي مارعۇلان (1904) بار. وسى جىلى تۋعان ساياساتكەرلەر اراسىندا تۇڭعىش پرەزيدەنت نۇرسۇلتان نازاربايەۆ (1940) تا بار. بەلگىلى سازگەر ەسكەندىر حاسانعاليەۆ تە ۇلۋ جىلىندا دۇنيە ەسىگىن اشقان ەدى.
مارجان تىلەۋبەك
egemen.kz
