ۇلۋ جىلى: 2024 -جىل قانداي بولادى؟

  شىعىس جىلناماسىنا سايكەس كەلەسى جىلدىڭ يەسى - ۇلۋ. حالىق اراسىندا ۇلۋ جىلى وتە جايلى، جاقسى جىل بولادى دەگەن سەنىم بار. بەيبىت ءومىردى سۇيەتىن، جايلى، تىنىشتىقتى جانى قالايتىن، اقىلدى دا زەرەك ادامدار وسى جىلى تۋادى دەسەدى.

ۇلۋ جىلىنىڭ ءبىر ەرەكشەلىگى ول بارلىق ۋاقىتتا كىبىسە جىلدارمەن تۋرا كەلەدى. ءتورت جىلدا ءبىر رەت قايتالانىپ كەلەتىن باسى ارتىق ءبىر كۇن 2024 -جىلدىڭ اقپان ايىنىڭ ۇلەسىنە تيەدى. وسىلايشا كەلەسى جىل 366 كۇننەن تۇرادى.

ۇلۋ سۋدا جۇرەتىن بولعاندىقتان، ادەتتە بۇل جىلى قۇرعاقشىلىق بولمايدى. جىل تىنىشتىقپەن، بەرەكە- مولشىلىقپەن وتكەن. قازاقتار ۇلۋ جىلى استىق، ءشوپ مول بولادى دەپ جورامالداعان. كەي جىلدارى بۇل جىل جايسىز كەلىپ وتىرعان. وعان بەيىمبەت مايليننىڭ «ۇلۋ» دەگەن ولەڭى دالەل بولادى:

ۇلۋ كەلىپ كوتەردى ەلدىڭ وبالىن،

مال جۇتاتىپ، سىنىن الدى قورانىڭ.

ناق ۇلۋداي ۇلىتقان جوق قازاقتى،

اتى شۋلى بىلتىرعى وتكەن «قويانىڭ» .

راس، 1916 -جىلى ۇلت- ازاتتىق كوتەرىلىس، قازاقستانداعى بايلاردىڭ مۇلكىن تاركىلەپ، وزدەرىن سىبىرگە جەر اۋدارعان 1928 -جىلعى گولوشەكيندىك كامپەسكە دە ۇلۋ جىلىندا بولعان.

ۇلۋ جىلىندا تاريحتا قانداي ەلەۋلى وقيعالار بولعان؟

2000 -جىل

- 2000 -جىل تاۋەلسىز قازاقستان تاريحىندا «مادەنيەتتى قولداۋ جىلىمەن» ەستە قالدى.

- 29-شىلدەدە بۇرىنعى سەمەي پوليگونىنداعى سوڭعى يادرولىق سىناق الاڭى جويىلدى.

- 23-تامىزدا قازاقستان رەسپۋبليكاسىنىڭ ۇلتتىق قورى قۇرىلدى.

- 15-قىركۇيەكتە سيدنەيدە XXVII جازعى وليمپيادا ويىندارىنىڭ الاۋى جاعىلدى. وسى ءدۇبىرلى دودادا قازاقستان ءۇش التىن، ءتورت كۇمىس ولجالاپ، زور جەتىستىككە جەتتى.

1988 -جىل

- اراعا 62 جىل سالىپ ناۋرىز مەرەكەسى قايتا تويلانا باستادى.

- قازاقستاندا 143 ميلليون توننا كومىر ءوندىرىلىپ، ول رەكوردتىق دەڭگەيگە جەتتى.

- ك س ر و- دا كووپەراتيۆتەر قۇرىلا باستادى. 24-تامىزدا بۇكىل كەڭەس وداعىندا العاشقى كووپەراتيۆتىك بانك شىمكەنت قالاسىندا اشىلدى.

- 15-مامىردان باستاپ كەڭەس اسكەرلەرىن اۋعانستاننان شىعارۋ باستالدى.

- 17-قىركۇيەك – 2-قازان ارالىعىندا XXIV جازعى وليمپيادا ويىندارى سەۋلدە ءوتتى. وسى دودادا قازاقستاننىڭ اۋىر اتلەتتەرى العاش رەت وليمپيادا مەدالىن يەلەندى. 90 كەلى سالماقتا شەبەرلىك سىناسقان زىلتەمىرشى اناتولي حراپاتىي وليمپيادا چەمپيونى اتاندى. جالپى، XXIV وليمپيادا ويىندارىندا كسرو قۇراما كومانداسىندا 30-قازاقستان سپورتشىسى قاتىستى. ولار ءارتۇرلى دارەجەدەگى 18 مەدالدى يەلەندى.

1976 -جىل

- قاڭتاردا جەر شارىنىڭ 4 ميللياردىنشى تۇرعىنى دۇنيەگە كەلدى.

- 16-اقپاندا كەڭەس وداعىندا العاش رەت «كاماز» كولىگى شىعارىلدى.

- 7-مامىردا - باس حاتشى لەونيد برەجنيەۆكە كەڭەس وداعىنىڭ مارشالى اتاعى بەرىلدى.

- الماتىنىڭ «قايراتى» قازاقستان فۋتبول تاريحىندا العاش رەت ك س ر و ءبىرىنشى ليگا كلۋبتارىنىڭ چەمپيوناتىندا جەڭىسكە جەتتى.

- 17-شىلدە – 1-تامىز ارلىعىندا XXI جازعى وليمپيادا ويىندارى كانادانىڭ مونرەال قالاسىندا ءوتتى. كسرو قۇراما كومانداسىنىڭ ساپىندا 14 قازاقستان سپورتشىسى 11 سپورت تۇرىنەن باق سىناپ، 8 التىن جانە 2 كۇمىس مەدالعا يە بولدى.

- 18-قىركۇيەكتە قىتاي حالقى كوسەمدەرى ماۋ زىدۋڭندى اقتىق ساپارعا شىعارىپ سالدى.

1964 -جىل

- دىنمۇحامەد قونايەۆ قازاقستان ورتالىق كوميتەتىنىڭ ءبىرىنشى حاتشىلىعىنا كەلدى.

- 14-قازاندا سوكپ ورتالىق كوميتەتىنىڭ قازان پلەنۋمىندا ن. حرۋشيەۆ بارلىق پارتيالىق قىزمەتىنەن بوساتىلدى. ءبىرىنشى حاتشىلىققا ل. برەجنيەۆ كەلدى.

- 16-قازاندا قىتاي العاش رەت يادرولىق قارۋىن سىناقتان وتكىزدى.

- 10-24-قازان ارىلىعىندا XVIII جازعى وليمپيادا ويىندارى توكيودا ءوتتى. بۇل وليمپيادا الاۋىنىڭ العاش رەت ازيا قۇرلىعىندا جاعىلۋى ەدى. وليمپيادانى توكيودا وتكىزۋ 1940 -جىلى دا بەلگىلەنگەن بولاتىن. ءبىراق جاپونيانىڭ قىتايعا باسىپ كىرۋىنە بايلانىستى ول حەلسينكيگە اۋىستىرىلىپ، ارتىنشا ەكىنشى دۇنيەجۇزىلىك سوعىستىڭ باستالۋىنان مۇلدەم وتپەي قالدى.