ەل بيۋدجەتىنىڭ ءۇش دونور ءوڭىرى بەلگىلى بولدى

استانا. KAZINFORM - بۇگىندە وڭىرلەردىڭ ورتالىق بيۋدجەتكە تاۋەلدىلىگى 49 پايىز دەڭگەيىندە ساقتالىپ وتىر.

بۇل تۋرالى پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين ءمالىم ەتتى.

- 2008 -جىلدان باستاپ بيۋدجەتارالىق قاتىناستار تۇراقتى سيپاتقا يە جانە بيۋدجەتتىك الىپ قويۋلار مەن سۋبۆەنتسيالار كولەمى وزگەرىسسىز 3 جىلعا زاڭمەن بەكىتىلەدى. ءۇش جىلدىق كەزەڭگە سۋبۆەنتسيالار مەن الىپ قويۋلاردى بەكىتۋ وڭىرلەر ءۇشىن ىنتالاندىرۋشى سيپاتقا يە جانە اكىمدەردىڭ قوسىمشا تابىستى جەرگىلىكتى ماڭىزى بار ماسەلەلەردى شەشۋگە دەربەس جۇمساۋىنا مۇمكىندىك بەرەدى. بيۋدجەتارالىق قاتىناستار جۇيەسىن جەتىلدىرۋ جونىندەگى جۇمىس تۇراقتى تۇردە جۇرگىزىلەدى، - دەدى سەرىك جۇمانعارين ماجىلىستە وتكەن ۇكىمەت ساعاتىندا.

بۇگىندە نەگىزگى باسىمدىقتار بەرىلىپ وتىر:

- وڭىرلەردىڭ ءوز الەۋەتىن جانە ەكونوميكالىق دەربەستىگىن ىسكە اسىرۋى ءۇشىن جاعداي جاساۋ؛
- بازالىق ينفراقۇرىلىمدا جانە جالپى دامۋدا اسا ۇلكەن الشاقتىقتارعا جول بەرمەۋ.

- بۇگىندە 20 ءوڭىردىڭ 17 سى سۋبۆەنتسيالىق، ورتالىققا تاۋەلدىلىك 49 پايىز دەڭگەيىندە ساقتالىپ وتىر. قالعان ءۇش ايماق - الماتى، استانا قالاسى جانە اتىراۋ وبلىسى دونور بولىپ وتىر. ءبىراق بۇل «شارتتى» كورسەتكىش ەكەنىن مويىنداۋ كەرەك، ورتالىقتان قوسىمشا ترانسفەرتتەردى دونور ايماقتار دا الىپ وتىر. مەگاپوليس قالالاردا، وبلىستاردا ءىرى جوبالاردىڭ كوپشىلىگى ورتالىقتان جۇزەگە اسىرىلادى. بۇل دەگەنىمىز مەتروپوليتەن قۇرىلىسى، استانا قالاسىنىڭ جاڭا كولىك جۇيەسى ياعني LRT، جايلى مەكتەپتەر، كولىكتىك جانە وزگە دە ينفراقۇرىلىمدى دامىتۋ جوبالارى. ۇكىمەت جۇمىسىنىڭ ودان ءارى ەكپىنى دامۋ ينستيتۋتتارىنىڭ قارقىنىن، ينفراقۇرىلىمدىق جوبالاردى قارجىلاندىرۋدىڭ بيۋدجەتتەن تىس قۇرالدارىن، مەملەكەتتىك قولداۋ شارالارىن دامىتۋ ارقىلى وڭىرلەردىڭ ەكونوميكالىق دەربەستىگىن قامتاماسىز ەتۋگە باعىتتالادى. جالپى، قابىلدانىپ جاتقان شارالاردان سالىق سالۋ بازاسىنىڭ ودان ءارى كەڭەيۋى، جالپى وڭىرلەردىڭ سالىق الەۋەتىنىڭ دامۋى كۇتىلەدى، - دەيدى مينيستر.

بۇگىن ماجىلىستە «جالپى سيپاتتاعى ترانسفەرتتەردى ايقىنداۋ جونىندەگى جاڭا تاسىلدەر» تاقىرىبىندا ۇكىمەت ساعاتى ءوتىپ جاتىر.

ەسكە سالايىق، مامىردا رەسپۋبليكا بيۋدجەتىنە ترانسفەرت اۋداراتىن جاڭا دونور وڭىرلەر پايدا بولاتىنى تۋرالى حابارلاعان ەدىك.