ەل استاناسى ورىنبوردان قىزىلورداعا كوشكەندە جەتكەن تاريحي ۇستەل مەكتەپ مۋزەيىندە تۇر

قىزىلوردا. KAZINFORM - وسىدان تۋرا ءجۇز جىل بۇرىن ەل استاناسى ورىنبوردان قىزىلورداعا كوشكەندە جەتكەن ۇستەل قالاداعى مەكتەپتەردىڭ بىرىندە ساقتاۋلى تۇر.

«ۇلاعات» جەكە مەكتەبىنىڭ قۇرىلتايشىسى، قارجىگەر قالقازبەك اجىبەكوۆ تاريحي جادىگەردى كوپ جىلدان بەرى كوزىنىڭ قاراشىعىنداي ساقتاپ كەلەدى. ونى قارجى باسقارماسىن باسقارىپ تۇرعاندا سونداعى مۋزەي قورىن تولىقتىرۋ بارىسىندا تاپقان.

- 1988 -جىلى ۇلتتىق بانككە بارعانمىن. سول كەزدە شارۋاشىلىق جونىندەگى ءبولىم باستىعى ەرباي شاعداروۆتىڭ كابينەتىندەگى ۇلكەن ويۋلى ۇستەلگە كوزىم تۇسكەنى بار. كەيىن مۋزەي اشىلعاندا سونى ىزدەدىم. ەرەكەڭە بارسام، الدىندا جاڭا ۇستەل. بۇرىنعىسىن جارامسىز دەپ سارايعا شىعارىپ تاستاعان ەكەن. شاڭ باسىپ تۇرعان جەرىنەن مۋزەيگە اكەپ قويدىم، - دەدى قالقازبەك اجىبەكوۆ.

ارادا ءبىراز جىل وتكەسىن مۋزەي جابىلىپ، جادىگەردى قايتادان قويماعا شىعارۋعا تۋرا كەلەدى. بەرىدە عانا ءبىلىم ورداسىنىڭ تورىنەن وعان ورىن تابىلدى. مەكتەپ قۇرىلتايشىسى سىرى كەتىپ، توزا باستاعان مۇلىكتى ۇستاعا قاشاتىپ، جوندەتىپ الدى. ايتپاقشى، بۇل ۇستەلدى ەڭ ءبىرىنشى قازاق ا ك س ر مەملەكەتتىك بانك باسشىسى پايدالانعان.

ەسكە سالايىق، بيىل - قىزىلوردا قالاسىنىڭ قازاق ا ك س ر- ءىنىڭ استاناسى اتانعانىنا 100 جىل.

اۆتور

نازەركە سانيازوۆا