كۇزدە ستۋدەنتتەردىڭ ستيپەندياسى قانشاعا وسەدى

استانا. KAZINFORM - عىلىم جانە جوعارى ءبىلىم ءمينيسترىنىڭ ورىنباسارى تالعات ەشەنقۇلوۆ ۇكىمەت وتىرىسىندا قىركۇيەك ايىندا ستۋدەنتتەردىڭ ستيپەندياسى قانشاعا وسەتىنىن ءمالىم ەتتى.

- كەيىنگى 5 -جىلدا قازاقستاندا گرانتتار سانى 1,4 ەسە ءوستى. 2024-2025 وقۋ جىلىنا 93116 گرانت ءبولىندى. سونىمەن قاتار، بيىل 1 - قىركۇيەكتەن باستاپ ءبىلىم الۋشىلاردىڭ ستيپەندياسىنىڭ ولشەمى وسەدى. باكالاۆريات ءۇشىن ستيپەنديانىڭ ولشەمى 52372 تەڭگە، ماگيستراتۋرادا 117098 تەڭگە جانە دوكتورانتتار ءۇشىن 262500 تەڭگە بولادى. ياعني، وسى جىلى باكالاۆريات دەڭگەيىندە ستيپەنديا كولەمى 2020 -جىلمەن سالىستىرعاندا 2 ەسەگە، ال ماگيستراتۋرا جانە دوكتورانتۋرا دەڭگەيىندە 1,75 ەسەگە ارتادى، - دەدى ۆيتسە- مينيستر.

تالعات ەشەنقۇلوۆ جاتاقحانالارداعى ورىن تاپشىلىعى 2019 -جىلى 82500 ورىن بولسا، 2024 -جىلى 14873 كە دەيىن تۇسكەنىن ايتتى.

- وسى رەتتە، ەرەكشە ءبىلىم بەرۋ قاجەتتىلىكتەرى بار بالالار ءۇشىن جاتاقحانالاردا ورىن بەرۋ جونىندەگى مەملەكەتتىك قىزمەت پرواكتيۆتى فورمات بويىنشا ۇسىنىلاتىنىن اتاپ وتكىم كەلەدى، - دەدى ءمينيستردىڭ ورىنباسارى.

ايتا كەتۋ كەرەك، ەلىمىزدە «بولاشاق» ستيپەندياسىنىڭ تيىمدىلىگى زەرتتەلىپ جاتىر.