كييەۆتە 11 ادامدى ولتىرگەن وزبەكستاندىق ءومىر بويىنا باس بوستاندىعىنان ايىرىلدى
استانا. KAZINFORM - ايىپتالۋشىنىڭ 3 ايەل مەن 8 ەر ادامنىڭ ءومىرىن قيعانى انىقتالدى. بۇل تۋرالى Uznews.uz سايتى قالالىق پروكۋراتۋرانىڭ باسپا ءسوز قىزمەتىنە سىلتەمە جاساپ حابارلادى.
كيەۆتە گولوسەيەۆ اۋداندىق سوتىنىڭ القاسى 2018 -جىلدىڭ اقپانى مەن 2024 -جىلدىڭ قاڭتارى ارالىعىندا 11 ادامدى ولتىرگەن جانە ءبىر ادامدى ولتىرۋگە وقتالعان وزبەكستان ازاماتىن ءومىر بويىنا باس بوستاندىعىنان ايىرۋ جازاسىنا كەستى.
ەر ادام 2024 -جىلدىڭ قاڭتارىندا كييەۆتىڭ گولوسەيەۆ اۋدانىنداعى گۇل ساتاتىن دۇكەنگە تاپسىرىس بەرۋشىنىڭ اتىن جامىلىپ كىرىپ، ساتۋشىعا 30 رەتتەن استام پىشاق سۇققان. كىسى ولتىرگەننەن كەيىن ول جابىرلەنۋشىنىڭ التىن بۇيىمدارىن الىپ، قاشىپ كەتكەن، ءبىراق كەيىن ۇستالعان.
جاۋاپ الۋ كەزىندە ول كىسى ولتىرگەنىن مويىنداپ، وسىعان ۇقساس قىلمىستار تۋرالى ەگجەي-تەگجەيلى ايتىپ بەردى. ونىڭ قۇرباندارى نەگىزىنەن ول كەزدەسكەن ءۇيسىز ادامدار بولدى. ولارمەن بىرگە سپيرتتىك ىشىمدىك ءىشىپ، كەيىن ولاردى ولتىرگەن. مارقۇمداردىڭ مايىتتەرى ءولىمنىڭ ناقتى جاعدايلارى مەن سەبەپتەرىن انىقتاۋ وتە قيىن ۋاقىتتان كەيىن تابىلدى.
ايىپتالۋشى قۇرباندارىنىڭ ءارقايسىسىن ەسكە الىپ، ەگجەي-تەگجەيلى مويىنداۋ جازانى جەڭىلدەتۋگە كومەكتەسەدى دەپ ۇمىتتەنگەنى اتاپ ءوتىلدى.
سوت ۇسىنىلعان دالەلدەمەلەردى ساراپتاپ، ەر ادامدى كىنالى دەپ تانىپ، وعان ەڭ جوعارعى جازا - ءومىر بويىنا باس بوستاندىعىنان ايىرۋ جازاسىن تاعايىندادى. ول قازىر قاماۋدا وتىر.
