كەيىنگى جەتى جىلدا مەملەكەت 419 اقىن-جازۋشىعا قالاماقى تولەگەن
استانا. KAZINFORM - مادەنيەت جانە اقپارات مينيسترلىگى Kazinform ساۋالىنا جولداعان جاۋابىندا بيۋجەت ەسەبىنەن قالاماقى العان اقىن-جازۋشىلاردىڭ سانىن اتادى.
«بۇرىندارى ەش جەردە جاريالانباعان قوعامدىق ماڭىزى بار ادەبيەت بويىنشا 2017-2023-جىلدارى 419 ادەبيەتتىڭ اۆتورلىق قۇقىعى ساتىپ الىنىپ، ياعني اۆتورلارعا قالاماقىسى تولەنىپ، باسىپ شىعارىلدى دا، وڭىرلەردەگى كىتاپحانالارعا تاراتىلدى. اۆتورلىق قالاماقى 1 اۆتورلىق پاراق ءۇشىن (40 مىڭ بەلگىگە) 6 ەڭ تومەنگى جالاقى مولشەرىنە تەڭەستىرىلگەن»، - دەپ جازىلعان جاۋاپتا.
ال بىلتىر 53 قالامگەر مەملەكەتتەن قالاماقى العان.
«2023-جىلى مەملەكەتتىك تاپسىرىسپەن قوعامدىق ماڭىزى بار ادەبيەتتى ساتىپ الۋ باعىتى بويىنشا 53 قالامگەردىڭ شىعارماسىنا اۆتورلىق قالاماقى تولەندى. اۆتورلىق قالاماقى 1 اۆتورلىق پاراققا 6 ەڭ تومەنگى جالاقى، ياعني 2023-جىلى 420 مىڭ تەڭگە مولشەرىندە بولعانىن اتاپ وتەمىز»، - دەلىنگەن مينيسترلىك مالىمەتىندە.
