كەيىنگى 5 جىلدا العاش رەت ارالعا سۋ جىبەرۋ جوسپارى 100 پايىزعا جۋىق ورىندالدى
قىزىلوردا. KAZINFORM - بيىل كەيىنگى 5 جىلدا العاش رەت ۆەگەتاتسيا كەزىندە ارال تەڭىزىنە سۋ جىبەرۋ جوسپارى %100 عا جۋىق ورىندالدى. جالپى 977 ميلليون تەكشە مەتر سۋ جىبەرىلدى.
كەيىنگى جىلدارى تەڭىزگە 350-400 ميلليون تەكشە مەتر سۋ كەلىپ وتىرسا، بيىلعى جىلدىڭ باسىنان بەرى بۇل كولەم 2 ميلليارد تەكشە مەتردەن استى، ال جىل سوڭىنا دەيىن تاعى شامامەن 500 ميلليون جىبەرۋ جوسپارلانىپ وتىر.
«ناتيجەسىندە، بۇگىنگى تاڭدا سولتۇستىك ارال تەڭىزىنىڭ سۋ كولەمى 22 ميلليارد تەكشە مەترگە جەتتى. تەڭىزگە وسىعان دەيىن ۆەگەتاتسيا كەزىندە سەكۋندىنا 7-10 تەكشە مەتر سۋ جىبەرىلگەن بولسا، بيىل سەكۋندىنا 60-70 تەكشە مەتر سۋ جىبەرىلدى»، - دەپ مالىمدەدى ارال- سىرداريا باسسەيندىك ينسپەكتسياسى باسشىسىنىڭ ورىنباسارى زەينۋللا قازتوعانوۆ.
بۇدان بولەك، اقشاتاۋ- سورعاق جانە قامىستىباس كولدەر جۇيەسىنە 45 ميلليون تەكشە مەتردەن استام سۋ جىبەرىلدى. بۇل بالىق شارۋاشىلىعى مەن تۋريزىمدى دامىتۋعا ءتيىمدى اسەر ەتىپ وتىر. ماسەلەن، كەيىنگى جىلدارى ارال تەڭىزىنىڭ مينەراليزاتسياسى ازايىپ، بالىقتىڭ كوبەيۋىنە جاعىمدى اسەر ەتۋدە. تەڭىز تارتىلعاننان بەرى جەرگىلىكتى بالىقشىلار جىلىنا 400 توننا عانا بالىق اۋلاسا، قازىر 7,5-8 مىڭ تونناعا دەيىن بالىق اۋلايدى.
76 جاستاعى قاراتەرەڭ اۋىلىنىڭ تۇرعىنى، بالىقشى كۇنتۋعان تۇرعانبايەۆ ءومىر بويى وسى كاسىپپەن اينالىسىپ كەلەدى. ونىڭ ايتۋىنشا، تۋعان ولكەگە سۋ كەلگەلى جاڭا مۇمكىندىكتەر پايدا بولعان.
«كوزىمىزدى اشقاننان تەڭىزدەن بالىق اۋلاۋمەن اينالىسىپ كەلەمىز. سۋ كەلگەلى بالىق تا جاندانىپ، دارياعا كىرىپ جاتىر. بيىل بىلتىرعىعا قاراعاندا بالىق كوبىرەك. ارالدى وسى دەڭگەيدە ۇستاپ تۇرسا، بالىق شارۋاشىلىعى داميدى»، - دەيدى ول.
وسى رەتتە سۋ رەسۋرستارى جانە يرريگاتسيا مينيسترلىگى دۇنيەجۇزىلىك بانكپەن بىرلەسىپ سولتۇستىك ارال تەڭىزىن ساقتاۋ جونىندەگى جوبانىڭ ەكىنشى كەزەڭىنە دايىندالىپ جاتىر. قازىرگى ۋاقىتتا جوبا بويىنشا قاجەتتى قۇجاتتاما ازىرلەنۋدە. ەكىنشى كەزەڭ سولتۇستىك ارالدى تۇراقتى سۋمەن قامتاماسىز ەتۋدەن باستاپ ەكونوميكالىق جانە الەۋمەتتىك جوبالاردى دامىتۋعا دەيىنگى ءتۇرلى باعىتتاردى قامتيدى.
