كيىكتىڭ 20 پايىزىن پايدالانساق، تەك ەتىنەن 2,5 ميلليارد دوللار تابىس تابۋعا بولادى - عالىم
استانا. KAZINFORM - بۇگىن پارلامەنت ماجىلىسىندە كيىك پوپۋلياتسياسىنا قاتىستى تاقىرىپتى تالقىلاۋ كەزىندە كيىكتەردى جارتىلاي بوستاندىقتا ءوسىرۋ تەحنولوگياسىن ەنگىزۋ ۇسىنىلدى.
ماجىلىستەگى اگرارلىق ماسەلەلەر كوميتەتىنىڭ كەڭەيتىلگەن وتىرىسىندا جاڭگىر حان اتىنداعى باتىس قازاقستان اگرارلىق- تەحنيكالىق ۋنيۆەرسيتەتىنىڭ عىلىم جونىندەگى پرورەكتورى، بيولوگيا عىلىمدارىنىڭ دوكتورى ءالجان ءشامشىدىن كيىككە قاتىستى جاسالعان زەرتتەۋلەر جونىندە تۇسىنىك بەردى.
- ەڭ نەگىزگى زەرتتەۋلەرىمىزگە توقتالساق، 2023 -جىلى عىلىم مينيسترلىگىنىڭ گرانتى بويىنشا ءتيىستى جۇمىس اتقارىلدى. وسى ورايدا پارازيتتىك ارۋلار زەرتتەلدى. Moniezia expanza قوزدىرعىشى %63,34 كيىكتەن شىقتى، ياعني وسى زەرتتەۋ دالاداعى كيىكتەرگە قاتىستى جاسالدى.
سونىمەن قاتار، كيىكتەردە پارازيتارلىق اۋرۋلاردىڭ قوزدىرعىشتارى بار ەكەنىن بايقالىپ وتىر. 4 ميلليون كيىك ەلىمىزدىڭ باتىس قازاقستان وڭىرىندە جايىلىپ جۇرسە، الداعى قىستا نە بولادى؟ دالاداعى كيىكتىڭ تابيعي ءولىمى 16-25 پايىز ارالىعىندا. 4 ميلليون كيىكتىڭ 20 پايىزى ولسە، كوكتەمدە 800 مىڭ كيىك ولەكسەسىن قالاي جيناستىرامىز؟ بۇل ءوز كەزەگىندە ءتۇرلى اۋرۋلاردىڭ وشاعىنا اينالۋى مۇمكىن. اتالعان ماسەلەنى ەسكەرە وتىرىپ، ۇكىمەتكە كيىكتى تۇراقتى پايدالانۋدى (ەتىن، تەرىسىن) ۇسىنعىمىز كەلەدى. ويتكەنى ءقازىر قولعا الماساق، ەرتەڭ بوي بەرمەي كەتەدى، - دەدى عالىم.
ونىڭ ايتۋىنشا، كيىكتەردى جارتىلاي بوستاندىقتا ءوسىرۋ تەحنولوگياسىن ەنگىزۋ كەرەك.
- ەگەر 4-5 ميلليون كيىكتىڭ جىل سايىن 20 پايىزىن پايدالانۋعا بەرسەك، تەك ەتتىڭ وزىنەن 2,5 ميلليارد ا ق ش دوللارىنا جۋىق تابىس الۋعا بولادى. ال ىشەگى مەن وزگە دە ىشكى ونىمدەرىنەن 1 ميلليارد دوللار تابىس تۇسەدى. سونىمەن قاتار، فارماتسيەۆتيكالىق باعىتتا دا زور مۇمكىندىك بار، - دەدى ءالجان ءشامشىدىن.
بۇدان بۇرىن حابارلانعانداي، بۇگىن ماجىلىستەگى اگرارلىق ماسەلەلەر كوميتەتىنىڭ كەڭەيتىلگەن وتىرىسىندا كيىكتىڭ ەگىس القاپتارى مەن شابىندىقتاردى تاپتاپ كەتۋىنەن باتىس قازاقستان جانە اقمولا وبلىسىنىڭ فەرمەرلەرى مەن اۋىل تۇرعىندارى زارداپ شەگىپ جاتقانى ايتىلدى.
