كيىكتىڭ 20 پايىزى اۋلانۋى مۇمكىن: ەتى مەن ءمۇيىزى قايدا تاپسىرىلادى

استانا. KAZINFORM - بۇعان دەيىن كيىك سانىن رەتتەۋگە، اۋلاۋعا قاتىستى عالىمداردىڭ بيولوگيالىق نەگىزدەمەسىن زوولوگيا ينستيتۋتى دايىندايتىنى ايتىلدى. وسى ورايدا بۇل قۇجات اياسىندا قانداي قورىتىندى شىعارىلدى؟ وسى سۇراققا عىلىم جانە جوعارى ءبىلىم مينيسترلىگى جاۋاپ بەردى.

- 2025 -جىلى قازاقستانداعى ورال جانە بەتپاقدالا كيىكتەرىنىڭ پوپۋلياتسياسى رەكوردتىق دەڭگەيگە جەتتى. بۇل جاعداي كيىكتەردىڭ اۋىل شارۋاشىلىعى جەرلەرىنە كىرۋىنە اكەلدى. «زوولوگيا ينستيتۋتى» ر م ك ءتيىستى بيولوگيالىق نەگىزدەمەنى ازىرلەپ، ونى جانۋارلار دۇنيەسى جونىندەگى ۋاكىلەتتى ورگانعا (ق ر ە ت ر م ورمان شارۋاشىلىعى جانە جانۋارلار دۇنيەسى كوميتەتى) ۇسىندى. بيولوگيالىق نەگىزدەمەدە كوپجىلدىق جانە قازىرگى عىلىمي دەرەكتەرگە، سونداي-اق كيىكتىڭ بيولوگيالىق ەرەكشەلىكتەرىنە سۇيەنە وتىرىپ، ولاردىڭ سانىن رەتتەۋ ۇسىنىلعان، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.

بۇل ۇسىنىسقا سايكەس، كيىكتىڭ ۇرعاشى جانە ەركەگىن قوسا العاندا، ورال پوپۋلياتسياسىنان - 460 مىڭ، بەتپاقدالا پوپۋلياتسياسىنان 290 مىڭىن الۋ ارقىلى سانىن رەتتەۋ ەسكەرىلگەن. جالپى العاندا، اۋلاناتىن كيىكتىڭ سانى %20 قۇرايدى.

- اۋلاۋ جىنىسى مەن جاسى بويىنشا بيولوگيالىق نەگىزدەلگەن پروپورتسيالاردى ساقتاي وتىرىپ (تۇراقتى پوپۋلياتسيا سانىن ساقتاي وتىرىپ، ەڭ جوعارى ەت ونىمدىلىگىن قامتاماسىز ەتەتىندەي تەكەلەردىڭ %40- ىن، ۇرعاشىلارىنىڭ %30- ىن، سونداي-اق ەركەگى مەن ۇرعاشى جاس كيىكتەردىڭ %30- ىن اۋلاۋ)، ۋاكىلەتتى ورگاننىڭ مامانداندىرىلعان قۇرىلىمى ۇيىمداستىراتىن ءتيىستى ءىس-شارالار ارقىلى جۇرگىزىلۋگە ءتيىس. اتاپ ايتقاندا، كيىكتەردىڭ تۇتاس ەتىن ەت كومبيناتتارىنا تاپسىرۋ كەرەك، مۇيىزدەرىن ارنايى مامانداندىرىلعان ناسىندا ساقتاپ، تۇگەندەپ، تاڭبالاۋ كەرەك. ماتەريالدىق-تەحنيكالىق بازانى، ينفراقۇرىلىمدى دامىتۋ، ۆەدومستۆوارالىق ءوزارا ءىس-قيمىل جانە كيىك پوپۋلياتسيالارىن ۇزاق مەرزىمدى تۇراقتى باسقارۋ ستراتەگياسىن ازىرلەۋ بويىنشا شارالار ۇسىنىلادى، - دەپ اتالىپ وتكەن مينيسترلىك اقپاراتىندا.

ەسكە سالساق، جاقىندا ەكولوگيا جانە تابيعي رەسۋرستار ءمينيسترى ەرلان نىسانبايەۆ عالىمداردىڭ بيولوگيالىق نەگىزدەمەسى اياسىندا قازاقستاندا كيىكتەردىڭ 20 پايىزى رەتتەۋگە جاتاتىنىن ايتتى.

بۇدان بۇرىن حابارلانعانداي، مينيستر ماۋسىم ايىنىڭ باسىندا عالىمدار كيىك سانىن رەتتەۋ تۋرلى بيولوگيالىق نەگىزدەمەنى قاشان ازىرلەيتىنىن ايتقان ەدى.

ەگەر كيىكتى اۋلاۋعا رۇقسات بەرىلسە، بۇل ءىس-شارالار كۇزدە باستالادى.

سونىمەن قاتار، جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىنىڭ عىلىم جونىندەگى پرورەكتورى، بيولوگيا عىلىمدارىنىڭ دوكتورى ءالجان ءشامشىدىن كيىككە قاتىستى جاسالعان زەرتتەۋلەر جونىندە تۇسىنىك بەردى.

ونىڭ پايىمىنشا، ەلىمىزدەگى 4-5 ميلليون كيىكتىڭ جىل سايىن 20 پايىزىن ەتكە پايدالانۋعا بەرۋگە بولادى.

اۆتور

رۋسلان عابباسوۆ