كيىكتەردىڭ ولەكسەسىن جۇك كولىگىنەن ءتۇسىرىپ جاتقان ۆيدەو: ەكولوگيا ۆيتسە-ءمينيسترى تۇسىنىكتەمە بەردى

استانا. قازاقپارات - ەكولوگيا جانە تابيعي رەسۋرستار ۆيتسە-ءمينيسترى نۇركەن شاربيەۆ جەلىدە كيىكتەردىڭ ولەكسەسى تۇسىرىلگەن ۆيدەو جونىندە تۇسىنىكتەمە بەردى، دەپ حابارلايدى Ulysmedia.kz.

كيىك سانىن رەتتەۋ نەمەسە قازىرگىدەي قالدىرۋ ماسەلەسى تالقىلانعان استاناداعى دوڭگەلەك ۇستەلدەن كەيىن Ulysmedia.kz ءتىلشىسى ۆيتسە-مينيستردەن اتالعان ۆيدەو جونىندە تۇسىنىكتەمە بەرۋدى وتىنگەن.

- ەكى ۆيدەو تاراعان. ۇلىتاۋداعى كامازدا تيەلگەن ولەكسەلەردىڭ ۆيدەوسىندا ءوزى قىرىلعان كيىكتەردىڭ ولەكسەسى تۇسىرىلگەن. قاڭتاردان باستاپ ولگەن كيىكتەر. قازىر قىرىلىپ جاتقان جوق. ادەتتە قىستا قىرىلعان كيىكتەردىڭ ولەكسەسىن قار كەتكەندە جيىپ الادى دا، كەيىن ۋتيليزاتسياعا جىبەرەدى. ۆيدەوعا سول ۋتيليزاتسيا پروتسەسى تۇسىرىلگەن. ەگەر ولەكسە كومەتىن ورىن تولىپ قالسا، ادەتتە ارنايى شۇڭقىرلار قازىلىپ ولەكسەسى ورتەلەدى، - دەيدى ول.

الەۋمەتتىك جەلىگە تاراعان ەكىنشى ۆيدەو - اپپاق كيگەن ادامداردىڭ تورعا تۇسكەن كيىكتەردى باۋىزداپ جاتقانى. ۆيتسە-ءمينيستردىڭ ايتۋىنشا، بۇل ۆيدەو كيىكتى اۋلاۋعا رۇقسات ەتىلگەن 2023 -جىلى تۇسىرىلگەن.

الەۋمەتتىك جەلىلەردە بۇعان دەيىن كيىكتەردىڭ ولىگى تيەلگەن جۇك كولىگىنىڭ ۆيدەوسى تاراعان ەدى.

بۇل بەينەماتەريالعا ورمان شارۋاشىلىعى جانە جانۋارلار دۇنيەسى كوميتەتى نازار اۋدارىپ، پىكىر بىلدىرگەن. ۆەدومستۆو وكىلدەرىنىڭ مالىمەتىنشە، بەينەجازبادا ۇلىتاۋ وبلىسىندا كيىك ولەكسەلەرىن كادەگە جاراتۋ پروتسەسى تۇسىرىلگەن.