كيىك ورىسىمەن شەكتەسەتىن شارۋاشىلىق جەر تەلىمدەرىنىڭ شەكاراسى قايتا بەلگىلەنۋى مۇمكىن
استانا. KAZINFORM - ەكولوگيا جانە تابيعي رەسۋرستار مينيسترلىگى Kazinform ساۋالىنا جولداعان جاۋاپتا كيىك سانىن رەتتەۋدىڭ نەگىزگى قاعيداتتارى ايقىندالعانىن ءمالىم ەتتى.
كيىك vs فەرمەر
پرەزيدەنت قاسىم-جومارت توقايەۆ ۇلىتاۋداعى ۇلتتىق قۇرىلتايدا ۇكىمەتكە كيىك سانىن رەتتەۋ ماسەلەسىن قايتا زەردەلەۋدى تاپسىرعان بولاتىن. ەكولوگيا جانە تابيعي رەسۋرستار مينيسترلىگى ءۇشىن جالعىز جۇتتىڭ نەمەسە ىندەتتىڭ كەسىرىنەن سانى كۇرت تومەندەي سالاتىن ەرەكشە جانۋاردىڭ سانىن قازىرگى دەڭگەيدە ۇستاپ تۇرۋ ماڭىزدى بولسا، اۋىل شارۋاشىلىعى مينيسترلىگىنە شارۋالاردىڭ كيىك تىرشىلىگىنەن زيان شەكپەگەنى ماڭىزدى. ادام تاراپىنان قاتىگەزدىك ارتىپ، اتۋ جيىلەسە، كيىكتەردىڭ كورشى ەلدەرگە اۋىپ كەتۋ قاۋپى تاعى بار.
ەكولوگيا مينيسترلىگىنىڭ ۇستانىمى قانداي؟
ەكولوگيا جانە تابيعي رەسۋرستار مينيسترلىگىنىڭ ماماندارى وسى تاۋەكەلدەردىڭ ءبارىن ەسكەرە كەلىپ، كيىك ورىستەرىن كارتاعا تۇسىرمەك. وسى كارتا نەگىزىندە كيىك پوپۋلياتسياسىنىڭ اۋماعىندا جاتقان شارۋاشىلىق تەلىمدەردىڭ شەكاراسىن قايتا بەلگىلەۋ ماسەلەسىن زەردەلەپ كورەدى.
- ءيا، مۇنداي ءتاسىل ءتيىمدى جانە جانجالسىز شەشىمدەردىڭ ءبىرى رەتىندە قاراستىرىلىپ وتىر. قازىرگى ۋاقىتتا زوولوگيا ينستيتۋتى 2024- 2026 -جىلدارعا ارنالعان باعدارلامالىق- ماقساتتى قارجىلاندىرۋ شەڭبەرىندە كيىك پوپۋلياتسياسىن ساقتاۋ جانە ونى تۇراقتى پايدالانۋدىڭ عىلىمي نەگىزدەلگەن جۇيەسىن ازىرلەۋ باعىتىندا زەرتتەۋلەر جۇرگىزىپ جاتىر. بۇل جۇمىستار اياسىندا كيىك ميگراتسيالىق دالىزدەرى كارتاعا ءتۇسىرىلىپ، ولاردىڭ ەكوجۇيەلىك ءرولى مەن جەر پايدالانۋ قۇرىلىمىمەن ءوزارا بايلانىسى زەرتتەلەدى، - دەپ جازادى ۆەدومستۆو وكىلدەرى.
بۇل عىلىمي زەرتتەۋلەردىڭ قورىتىندىسى بولاشاقتا مىناداي رەتتەۋ تەتىكتەرىن قاراستىرا الادى:
كيىك دالىزدەرىن ساقتاپ قالۋ ماقساتىندا ۋاقىتشا نەمەسە تۇراقتى اشىق ۋچاسكەلەر قالدىرۋ؛
دالىزگە تۇسكەن اۋىل شارۋاشىلىعى جەرلەرىن ەكۆيۆالەنتتى جايىلىم نەمەسە شابىندىقپەن اۋىستىرۋ؛
شارۋا قوجالىقتارىنا قورشاۋ جۇيەسىن ورناتۋعا (توپسالى تور، تىرەۋىشتەر) سۋبسيديالار ۇسىنۋ؛
جەر كوميسسيالارىنا مينيسترلىكتىڭ اۋماقتىق وكىلدەرىن قوسۋ ارقىلى كيىك ميگراتسياسىنا ۇيلەستىرىلگەن شەشىمدەر قابىلداۋ.
- بۇل شارالار فەرمەرلەردىڭ وندىرىستىك مۇددەسىنە نۇقسان كەلتىرمەي، سونىمەن قاتار كيىك پوپۋلياتسياسىنىڭ تابيعي ميگراتسياسىن قامتاماسىز ەتۋگە باعىتتالعان، - دەپ جازىلعان رەسمي جاۋاپتا.
ا ش م نە ۇسىنادى؟
- جەر كودەكسىنىڭ 84-بابىنىڭ 1-تارماعىنا سايكەس جەر ۋچاسكەسى مەنشىك يەسىنىڭ نەمەسە مەملەكەتتىك ەمەس جەر پايدالانۋشىنىڭ كەلىسىمىمەن، نە سوتتىڭ شەشىمى بويىنشا مۇلىكتى بالامالى وتەۋ شارتىمەن ايرىقشا جاعدايلاردا مەملەكەت مۇقتاجى ءۇشىن ماجبۇرلەپ يەلىكتەن شىعارىلۋى مۇمكىن، - دەپ جازادى مينيسترلىك ماماندارى.
سونداي-اق جاۋاپتا كيىك ءورىسى ەرەكشە قورعالاتىن اۋماققا جاتپاسا، كەز كەلگەن ۋاقىتتا شارۋاشىلىق ماقسات بەرىلۋى مۇمكىن ەكەنى ايتىلعان.
- اقبوكەندەردىڭ كوشى-قونى اۋقىمىندا اۋىل شارۋاشىلىعى ءوندىرىسى ءۇشىن جەر ۋچاسكەلەرىن بەرۋگە جانە كەڭەيتۋگە موراتوري ەنگىزۋ وسى اۋماقتار ەرەكشە قورعالاتىن اۋماقتارعا بەكىتىلىپ بەرىلگەن جاعدايدا عانا مۇمكىن بولادى، - دەپ جازىلعان ۆەدومستۆو جاۋابىندا.
ال بۇعان دەيىن ەكولوگيا جانە تابيعي رەسۋرستار ءمينيسترى ەرلان نىسانبايەۆ ب ا ق وكىلدەرىنىڭ سۇراعىنا بەرگەن جاۋابىندا كيىك سانىن رەتتەۋ ارنايى قاۋمالدا ۇستاۋ نەمەسە اتۋ ارقىلى ۇيىمداستىرىلۋى مۇمكىن ەكەنىن ايتقان ەدى.
اۆتور
ەسىمجان ناقتىباي
