كيىك ەتى قاۋىپتى مە - مينيسترلىك جاۋابى

استانا. KAZINFORM - الەۋمەتتىك جەلىلەر مەن ب ا ق- تا كيىك ەتىن تۇتىنۋ كەزىندە جۇقتىرۋ قاۋپى تۋرالى جاريالانىمدارعا بايلانىستى اۋىل شارۋاشىلىعى مينيسترلىگى رەسمي تۇسىنىك بەردى.

مينيسترلىك تاراتقان اقپاراتتا ايتىلعانداي، كيىك سانىن رەتتەۋ جۇمىسىن «وحوتزووپروم» مەكەمەسىنىڭ قىزمەتكەرلەرى جۇزەگە اسىرادى. سويىلعان كيىك ۇشالارى مۇزداتقىشقا سالىنىپ، سويۋ پۋنكتتەرىنە جەتكىزىلەدى.

- جانۋارلاردىڭ اسا قاۋىپتى اۋرۋلارىن (ۇساق كۇيىس قايىراتىن جانۋارلاردىڭ وباسى، اۋسىل، برۋتسەللەز، پاستەرەللەز، ءسىبىر جاراسى جانە تاعى باسقا) بولدىرماۋ ماقساتىندا كيىكتەردىڭ پوپۋلياتسياسىنا ۇلتتىق ۆەتەريناريا رەفەرەنتتىك ورتالىعى تۇراقتى تۇردە ەپيزووتيالىق مونيتورينگ جۇرگىزەدى. سونىمەن قاتار، كيىكتەردىڭ جايىلىمى مەن سۋاتتاردا ۆەتەريناريالىق قىزمەت تۇراقتى تۇردە مونيتورينگتىك زەرتتەۋلەر جۇرگىزىپ وتىرادى. كيىكتەردى سويۋ جانە بيولوگيالىق قالدىقتاردى زالالسىزداندىرۋ بويىنشا ءتيىستى نورماتيۆتەر قابىلدانعان. 2023-جىلعى 27-قاراشادا ق ر س ت «سايعاق ەتى بۇقتىرىلعان. تەحنيكالىق شارتتار» جانە ق ر س ت «سايعاق ەتى - تۇتاس جانە جارتىلاي ۇشالار. جالپى تەحنيكالىق شارتتار» ۇلتتىق ستاندارتتارى بەكىتىلگەن، - دەلىنگەن حابارلامادا.

قازىر 6 وڭىردە 24 كيىك سويۋ پۋنكتى بار. سويۋعا ارنالعان وبەكتىلەر ۆەتەريناريالىق-سانيتاريالىق تالاپتارعا ساي (مال سويۋعا ارنالعان ارنايى بولمەلەر، توڭازىتقىش كامەرالار، ۇشالاردى ىلۋگە ارنالعان قۇرالدار، سۋمەن جابدىقتاۋ جانە ت. ب.). ۇشالار سويۋ ورىندارىنا جەتكىزىلگەن سوڭ، ولار ۆەتەريناريالىق دارىگەرلەردىڭ باقىلاۋىنان ءوتىپ، ۆەتەريناريالىق- سانيتاريالىق ساراپتاما جاسالادى.

- كيىك ەتىنە مىندەتتى زەرتتەۋ جۇرگىزىلەدى، ونىڭ ىشىندە ۇشا، ىشكى اعزالارى مەن باسىنىڭ ورگانولەپتيكالىق قاراۋدان وتەدى. بارلىق قولجەتىمدى ليمفا ءتۇيىندى جارىپ، ىشكى اعزالارى ءتىلىپ تەكسەرىلەدى، سونىمەن قاتار قايناتۋ سىناماسى، فيننوزعا (تسيستيتسەركوز) زەرتتەلىپ، جالپى رادياتسيالىق فوندى انىقتايدى. ۇشانىڭ ۆەتەريناريالىق تالاپتارعا سايكەستىگى انىقتالعان سوڭ، ەت ءارى قاراي بولشەكتەلىپ، وڭدەلەدى، ال قالدىقتار زالالسىزداندىرىلادى. كيىك ەتى قولدانىسقا جىبەرەر الدىندا ۆەتەريناريالىق دارىگەردىڭ انىقتاماسى بەرىلەدى. ول قۇجات ءونىمنىڭ شىققان جەرىن، قاۋىپسىزدىگىن جانە ساپاسىن راستايدى، - دەپ حابارلايدى ۆەدومستۆو.

ەسكەرەتىن جايت، كيىك ەتى ۆەتەريناريالىق-سانيتاريالىق قاۋىپسىزدىك تالاپتارىنا ساي بولۋى قاجەت. قازاقستان رەسپۋبليكاسىنىڭ «ۆەتەريناريا تۋرالى» زاڭىنىڭ 22-بابىنا سايكەس، جانۋارلاردان الىناتىن ونىمدەر مەن شيكىزاتتى ۆەتەريناريالىق-سانيتاريالىق ساراپتاماسىز وتكىزۋگە تىيىم سالىنادى.

- سونىمەن قاتار، ساۋدا نىساندارىندا ۆەتەريناريالىق ينسپەكتورلار كۇندەلىكتى باقىلاۋ جۇرگىزەدى. ولار ۆەتەريناريالىق انىقتامانىڭ جانە سويۋ ورنىنىڭ تاڭباسىنىڭ بولۋىن، ءونىمدى تاسىمالداۋ كەزىندە تەمپەراتۋرالىق رەجيمنىڭ ساقتالۋىن، زەرتحانالىق باقىلاۋ ناتيجەلەرىن تەكسەرەدى. وسىعان بايلانىستى، ۆەتەريناريالىق باقىلاۋ جانە قاداعالاۋ كوميتەتى تۇتىنۋشىلارعا كيىك ەتىن ارنايى بەلگىلەنگەن ورىنداردان جانە ۆەتەريناريالىق ىلەسپە قۇجاتتار بولعان جاعدايدا عانا، تاماقتانۋ جانە ۆەتەريناريالىق-سانيتاريالىق قاۋىپسىزدىك تالاپتارىنا سايكەس ساتىپ الۋدى ۇسىنادى، - دەپ ءتۇسىندىردى اۋىل شارۋاشىلىعى مينيسترلىگىنەن.

ايتا كەتسەك، بىرەر كۇن بۇرىن اۋىل شارۋاشىلىعى مينيسترلىگى كيىك ەتىنىڭ باعاسىن جاريالادى. ۆەدومستۆو ءبىر كەلى كيىك ەتىن 1600 تەڭگەدەن ۇسىنىپ وتىر.

بۇعان دەيىن حابارلاعانىمىزداي، باتىس قازاقستاندىق عالىمدار كيىك ەتىنەن شۇجىق جاساپ شىعاردى.