كيىك تاپتاعان جايىلىمعا سۋبسيديا تولەۋ مۇمكىن ەمەس - ا ش م
استانا. KAZINFORM - اۋىل شارۋاشىلىعى مينيسترلىگىندەگىلەر Kazinform ساۋالىنا جولداعان جاۋاپتا كيىك تاپتاعان جايىلىمنىڭ شىعىنىن سۋبسيديامەن تولتىرۋ مۇمكىن ەمەس ەكەنىن ايتتى.
مينيسترلىك ونىڭ ورنىنا جايىلىمداردى تورمەن قورشاۋ شىعىندارىنىڭ پايىزىن سۋبسيديالاۋدى ۇسىنىپ وتىر.
- اقبوكەندەردىڭ جايىلىمعا كەلتىرگەن زالالىن وبەكتيۆتى باعالاۋ ماسەلەسى بار. زالالدى ەسەپتەۋ قيىن جانە سىبايلاس جەمقورلىق تاۋەكەلدەرى تۋىنداۋى ىقتيمال. اكىمشىلەندىرۋدىڭ كۇردەلىلىگى جانە اشىق پروتسەدۋرالاردىڭ بولماۋى جەرگىلىكتى بيۋدجەتتىڭ ءتيىمسىز جۇمسالۋىنا اكەلۋى مۇمكىن، ويتكەنى ءشوپتىڭ مولشەرى مەن ناقتى زالالدى ءدال انىقتاۋ مۇمكىن ەمەس، - دەپ جازىلعان مينيسترلىك مالىمەتىندە.
ءبىراق بۇل كيىك پوپۋلياتسياسىنان زارداپ شەككەن شارۋالارعا مەملەكەت كومەك كورسەتۋدەن باس تارتىپ وتىر دەگەن ءسوز ەمەس.
- اۋىل شارۋاشىلىعى جەرلەرىن كيىكتەردەن قورشاۋعا ارنالعان توپسالى تورلاردى قۋما مەترىن 700 تەڭگە جانە توپسالى توردى بەكىتۋگە ارنالعان باعانداردى (مەتالل نەمەسە بەتون) ءبىر داناسىن 3750 تەڭگە ساتىپ الۋ كەزىندە ينۆەستيتسيالىق سالىمداردى وتەۋ ۇلەسى جەرگىلىكتى بيۋدجەت قاراجاتى ەسەبىنەن %50 سۋبسيديالانادى، - دەپ جازادى ۆەدومستۆو ماماندارى.
بۇعان دەيىن ەكولوگيا جانە تابيعي رەسۋرستار ءمينيسترى ەرلان نىسانبايەۆ ب ا ق وكىلدەرىنىڭ سۇراعىنا بەرگەن جاۋابىندا كيىك سانىن رەتتەۋ ارنايى قاۋمالدا ۇستاۋ نەمەسە اتۋ ارقىلى ۇيىمداستىرىلۋى مۇمكىن ەكەنىن ايتقان ەدى.
