كيىك سانىن رەتتەۋ ءىس-شارالارى كۇزدە باستالۋى مۇمكىن

استانا. KAZINFORM - ەگەر كيىكتى اۋلاۋعا رۇقسات بەرىلسە، بۇل ءىس-شارالار كۇزدە باستالادى. بۇل تۋرالى ەكولوگيا جانە تابيعي رەسۋرستار ۆيتسە-ءمينيسترى نۇركەن شاربيەۆ ءمالىم ەتتى.

- قازىر كيىك تولدەپ جاتىر. جالپى، كيىك سانىن رەتتەۋ ءىس-شارالارى قىركۇيەك ايىندا باستالىپ، قاراشانىڭ اياعىنا دەيىن ىسكە اسىرىلۋى مۇمكىن… اتاپ ايتقاندا، كيىك سانىن رەتتەۋ ماسەلەسى عالىمداردىڭ بيولوگيالىق نەگىزدەمەسى اياسىندا شەشىلەدى، - دەدى ن. شاربيەۆ پارلامەنت ماجىلىسىندە تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، بۇگىن پارلامەنت ماجىلىسىندەگى تالقىلاۋ كەزىندە عالىمدار ءتيىستى مالىمەتتەردى كەلتىرگەن. كەڭەستىك كەزەڭدە جىل سايىن كيىك سانى رەتتەۋگە رۇقسات بەرەتىن، ياعني 300 مىڭىن ازايتۋعا شەشىم جاسالىپ وتىرعان. بۇل رەتتە، جىلدا 20 پايىزىن اۋلاعان.

ايتا كەتەيىك، وسى اپتادا ۇكىمەتكە كيىك سانىن رەتتەۋگە قاتىستى عالىمداردى بيولوگيالىق نەگىزدەمەسى ۇسىنىلادى.

بۇدان بۇرىن حابارلانعانداي، بۇگىن ماجىلىستەگى اگرارلىق ماسەلەلەر كوميتەتىنىڭ كەڭەيتىلگەن وتىرىسىندا كيىكتىڭ ەگىس القاپتارى مەن شابىندىقتاردى تاپتاپ كەتۋىنەن باتىس قازاقستان جانە اقمولا وبلىسىنىڭ فەرمەرلەرى مەن اۋىل تۇرعىندارى زارداپ شەگىپ جاتقانى ايتىلدى.

سونىمەن قاتار، جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىنىڭ عىلىم جونىندەگى پرورەكتورى، بيولوگيا عىلىمدارىنىڭ دوكتورى ءالجان شامشىدىن كيىككە قاتىستى جاسالعان زەرتتەۋلەر جونىندە تۇسىنىك بەردى.

ونىڭ پايىمىنشا، ەلىمىزدەگى 4-5 ميلليون كيىكتىڭ جىل سايىن 20 پايىزىن ەتكە پايدالانۋعا بەرۋگە بولادى.

اۆتور

رۋسلان عابباسوۆ