كيىك ديحانداردى 12 ميلليارد تەڭگە شىعىنعا باتىردى
كيىك اۋىل شارۋاشىلىعىنا 12 ميلليارد تەڭگە شىعىن اكەلدى. بۇل تۋرالى ەكولوگيا جانە تابيعي رەسۋرستار ءمينيسترى ەرلان نىسانبايەۆ ايتتى، دەپ حابارلايدى Kazinform.

«بۇگىندە كيىك سانىنىڭ ارتۋى اۋىل شارۋاشىلىعىنا زيانىن تيىگىزىپ جاتىر. قازىردىڭ وزىندە اۋىل شارۋاشىلىعى سالاسىنداعى ديحانشىلارعا 12 ميلليارد تەڭگە زالال كەلىپ وتىر. اشىعىن ايتايىن، ەجەلدەن تابيعاتتا كەلە جاتقان كيىك باسىن رەتتەۋ جۇيەسى بۇگىندە جۇمىس ىستەيدى. بۇرىننان كيىك سانىن كىم رەتتەيتىن؟ ونى رەتتەيتىن قاسقىر، جۇت، اۋرۋ بولاتىن. بۇگىندە ءبىز جۇتتى كۇتىپ وتىرماۋىمىز كەرەك. كيىك سانى بۇگىنگىدەي كوپ بولسا، وندا جۇت بولادى»، - دەدى مينيستر ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
ايتا كەتەيىك، كيىك سانىنىڭ ارتۋى اۋىلشارۋاشىلىق جانۋارلارىمەن جايىلىمدار مەن سۋاراتىن جەرلەر ءۇشىن باسەكەنى كۇشەيتتى، ەگىس القاپتارىنىڭ تاپتالۋىنا اكەلدى. سوڭعى ءۇش جىلدا كيىكتەر مەكەندەيتىن وڭىرلەردە، اسىرەسە باتىس قازاقستان وبلىسىندا الەۋمەتتىك شيەلەنىس بايقالىپ وتىر.
اۋىل شارۋاشىلىعى مينيسترلىگىنىڭ اقپاراتى بويىنشا شامامەن 121,9 مىڭ گەكتارعا جۋىق ەگىس، 247,7 مىڭ گەكتار شابىندىق جانە 882,6 مىڭ گەكتار جايىلىم جەرلەرى زارداپ شەكتى.