كيىك ءمۇيىزىن زاڭدى تۇردە ەكسپورتتاۋعا رۇقسات بەرىلۋى مۇمكىن
استانا. KAZINFORM - بيىل كۇزدە كيىكتەردى اۋلاۋ باستالعان جاعدايدا، اڭشىلار جانۋارلاردىڭ ءمۇيىزىن قايدا وتكىزەدى؟ بۇل سۇراققا ق ر ەكولوگيا جانە تابيعي رەسۋرستار مينيسترلىگى جاۋاپ بەردى.
- 2023-2024 -جىلعى (كيىك سانىن) رەتتەۋ شارالارى ناتيجەسىندە الىنعان كيىك مۇيىزدەرى قازىرگى ۋاقىتتا «وحوتزووپروم» ءو ب» ر م ق ك- نىڭ باقىلاۋىندا ساقتاۋلى تۇر. بۇل مۇيىزدەر ارنايى جابدىقتالعان جالعا الىنعان بولمەدە ورنالاستىرىلعان. بولمەدە بەينەباقىلاۋ جۇيەسى، تۇراقتى تەمپەراتۋرالىق رەجيم جانە بارلىق قاجەتتى قاۋىپسىزدىك شارالارى قامتاماسىز ەتىلگەن. الايدا، قازىرگى ۋاقىتتا حالىقارالىق شەكتەۋلەرگە بايلانىستى كيىك مۇيىزدەرىن كادەگە جاراتۋ مۇمكىن ەمەس، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.
بۇل شەكتەۋلەر قۇرىپ كەتۋ قاۋپى تونگەن جابايى فاۋنا مەن فلورا تۇرلەرىمەن حالىقارالىق ساۋدا تۋرالى كونۆەنتسيا (CITES) اياسىنداعى شەكتەۋلەرمەن بايلانىستى. سونىمەن قاتار ۆەدومستۆو بيىل كۇزدە كيىك اۋلاۋ باستالعان جاعدايدا، بوكەندەردىڭ ءمۇيىزى قايدا ساقتالاتىنىن ناقتىلادى.
- بيىل جۇرگىزىلەتىن رەتتەۋ ناتيجەسىندە الىنعا كيىك مۇيىزدەرى دە «وحوتزووپروم» ءو ب» ر م ق ك- دا ساقتاۋدا بولادى. CITES قويعان شەكتەۋلەردى الۋ وسى جىلدىڭ قاراشا ايىندا تاراپتاردىڭ كەزدەسۋىندە قاراستىرىلاتىن بولادى. شەكتەۋلەر الىنعان جاعدايدا، مۇيىزدەردىڭ ەكسپورتىنا رۇقسات بەرىلەدى، - دەپ اتالىپ وتكەن ەكولوگيا مينيسترلىگى اقپاراتىندا.
ەسكە سالساق، جاقىندا ەكولوگيا جانە تابيعي رەسۋرستار ءمينيسترى ەرلان نىسانبايەۆ عالىمداردىڭ بيولوگيالىق نەگىزدەمەسى اياسىندا قازاقستاندا كيىكتەردىڭ 20 پايىزى رەتتەۋگە جاتاتىنىن ايتتى.
ەگەر كيىكتى اۋلاۋعا رۇقسات بەرىلسە، بۇل ءىس- شارالار كۇزدە باستالادى.
سونىمەن قاتار، جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىنىڭ عىلىم جونىندەگى پرورەكتورى، بيولوگيا عىلىمدارىنىڭ دوكتورى ءالجان ءشامشىدىن كيىككە قاتىستى جاسالعان زەرتتەۋلەر جونىندە تۇسىنىك بەردى.
بۇدان بۇرىن حابارلانعانداي، 2023 -جىلى ەل اۋماعىندا 42 مىڭ باس كيىك اتىلدى.
