كيىك ءمۇيىزىن ساتىپ، ساقتاعانداردىڭ جازاسى جەڭىلدەيدى - ابزال قۇسپان
استانا. KAZINFORM - كونستيتۋتسيانىڭ 30 جىلدىعىنا وراي كەيبىر سوتتالعاندارعا راقىمشىلىق جاساۋدى كوزدەيتىن زاڭ جوباسىن تالقىلاۋ كەزىندە كيىك اتۋ، زاڭسىز بالىق اۋلاۋ سياقتى قىلمىستارى ءۇشىن باس بوستاندىعىنان ايىرىلعانداردىڭ موينىنداعى مەملەكەتتىك زالال بەرەشەگى قالاي وندىرىلەتىنى ءسوز بولدى.
باس پروكۋروردىڭ ورىنباسارى اسەت شىنداليەۆ راقىمشىلىق شاراسى سوتتالعان ادامنىڭ ماتەريالدىق بەرەشەگىنە اسەر ەتپەيتىنىن، تەك باس بوستاندىعىنان ايىرۋ مەرزىمىن قامتيتىنىن ءتۇسىندىردى.
- ەكولوگيالىق زالال كەلتىرگەنى ءۇشىن سوتتالعان ادامدار راقىمشىلىققا ءىلىنىپ، بوساپ جاتسا، ولاردىڭ موينىنداعى بەرەشەك سول كۇيى قالادى. ياعني، ونىڭ كەزەڭ-كەزەڭمەن تولىق وتەۋگە مىندەتتى، - دەدى ول.
زاڭ جوباسىن تانىستىرعان دەپۋتات ابزال قۇسپان 2019 -جىلى ەكولوگيالىق قىلمىستاردىڭ جازاسى كۇشەيتىلگەن كەزەڭنەن باستاپ 800 دەي ادام سوتتالعانىن، سونىڭ 180 دەيى قازىر باس بوستاندىعىنان ايىرۋ مەكەمەلەرىندە وتىرعانىن ايتتى.
- وسىدان ەكى اپتا بۇرىن ءوزىمىز قابىلداعان قىلمىستىق زاڭنامانى وڭتايلاندىرۋ تۋرالى زاڭنىڭ اياسىندا ءبىز قىلمىستىق كودەكسكە بىرنەشە ۇسىنىس بەردىك. سونىڭ ىشىندەگى 339-باپقا 1 قوسىمشا ەنگىزدىك. ونىڭ ىشىنە ءوزىڭىز ايتقان، قولىنا قارۋ الىپ، كيىك اتپاعان نەمەسە زاڭسىز ابلىق اۋلاماعان، ءبىراق ونى جيناپ، ساتۋعا قاتىسقان ازاماتتاردىڭ ءىسى قايتا قارالادى. بۇل نورما بۇرىن سوتتالىپ كەتكەن ازاماتتارعا قولدانىلادى. قىلمىستىق كودەكستىڭ 6-بابى بويىنشا زاڭنىڭ جەڭىلدەتۋ باعىتىندا كەرى كۇش بولادى. ياعني، ول ازاماتتاردان ەكولوگيالىق زالالدىڭ ءبارىن وتەسە جازاسى جەڭىلدەيدى.
قازىر زاڭ جوباسى سەناتتا جاتىر. سەناتتان ءوتىپ مەملەكەت باسشىسى قول قويسا، 339-باپتىڭ 1-قوسىمشاسى ارقىلى جازالارى جەڭىلدەۋى مۇمكىن، - دەدى دەپۋتات.
ەسكە سالساق، كونستيتۋتسيانىڭ 30 -جىلدىعىنا ارنالعان راقىمشىلىق اياسىندا 4,1 مىڭ ادام بوسايتىنى ءمالىم بولعان ەدى.
