كيىك اۋلاۋعا رۇقسات ەتىلەتىن مەرزىم بەلگىلەندى

كيىك اۋلاۋعا 1- قازان مەن 15- قاراشا ارالىعىندا رۇقسات ەتىلمەك. قۇجات اشىق ن ق ا پورتالىندا قوعام تالقىلاۋىنا ۇسىنىلدى.

6- قازاننان باستاپ ەكولوگيا ءمينيسترىنىڭ قازاقستاندا كيىكتەردىڭ سانىن رەتتەۋ تۋرالى بۇيرىعى كۇشىنە ەنگەن ەدى. مينيسترلىكتىڭ ەسەبىنە سايكەس، قازاقستانداعى كيىكتەر سانى 2 ميلليونعا جاقىنداعان.

ال بيىلعى ءتولدى قوسقاندا 2 ميلليوننان دا اسىپ تۇسكەن بولۋى مۇمكىن. وسى سەبەپتەن كيىكتەردىڭ ورالدىق پوپۋلياتسياسىن 20 پايىزعا، بەتپاقدالالىق پوپۋلياتسياسىن 15 پايىزعا قىسقارتۋعا شەشىم قابىلداندى.

«قازاقستاننىڭ بيوالۋانتۇرلىلىگىن ساقتاۋ قاۋىمداستىعى ازىرلەگەن بيولوگيالىق نەگىزدەمەگە سايكەس، جىنىس قۇرامى مەن مەكەندەۋ ورتاسىنا قاراماستان، كيىكتى اۋلاۋ مەرزىمىن 1- قازاننان 15- قاراشاعا دەيىن بەلگىلەۋ ۇسىنىلدى»، - دەلىنگەن قۇجات جوباسىندا.

ايتا كەتەيىك، قازاقستاندا اڭ اۋلاۋ قاعيدالارىنا ەنگىزىلەتىن وزگەرىستەر جوباسى ازىرلەنىپ، وندا جىل سايىن كيىك اۋلاۋعا رۇقسات ەتىلەتىن مەرزىم بەلگىلەندى.