كيىك اۋلاۋعا كىمدەرگە رۇقسات ەتىلەدى
استانا. KAZINFORM - جاقىندا كيىك سانىن رەتتەۋگە، اۋلاۋعا قاتىستى عالىمداردىڭ بيولوگيالىق نەگىزدەمەسىن زوولوگيا ينستيتۋتى دايىنداعانى ءمالىم بولدى. وسى ورايدا ق ر ەكولوگيا جانە تابيعي رەسۋرستار مينيسترلىگى وسى ماسەلەگە قاتىستى تۇسىنىك بەردى.
- قازىر كيىكتەردىڭ پوپۋلياتسياسىن رەتتەۋ ماسەلەسى قازاقستان ءۇشىن ماڭىزدى سانالادى. وسىعان بايلانىستى زوولوگيا ينستيتۋتىنىڭ عالىمدارى جان-جاقتى زەرتتەپ، بيولوگيالىق نەگىزدەمە ازىرلەدى. بۇل نەگىزدەمە كيىكتەردىڭ ەكوجۇيەدەگى ءرولىن، ولاردىڭ پوپۋلياتسيالىق ديناميكاسىن جانە مەكەندەۋ ورتاسىنىڭ سىيىمدىلىعىن ەسكەرە وتىرىپ جاسالعان. جۇرگىزىلگەن عىلىمي زەرتتەۋلەر ناتيجەلەرىنە سايكەس، بەتپاقدالا جانە ورال كيىكتەر تارالىمدارىنداعى پوپۋلياتسيا تىعىزدىعىن وڭتايلاندىرۋ ماقساتىندا رەتتەۋ شارالارىن قولدانۋ قاجەتتىلىگى تۋىندادى. اتاپ ايتقاندا، اتالعان تارالىمدارداعى كيىكتەردىڭ جالپى سانىنىڭ 20 پايىزىن الۋعا (اۋلاۋعا) ۇسىنىس بەرىلدى، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.
مامانداردىڭ پايىمانشا، بۇل ۇسىنىس كيىكتەردىڭ گەنەتيكالىق ارتۇرلىلىگىن ساقتاۋعا، تابيعي تەپە-تەڭدىكتى قالپىنا كەلتىرۋگە باعىتتالعان.
بۇل تۇرعىدا كيىكتەردىڭ سانى اتۋ نەمەسە تورعا ءتۇسىرۋ ارقىلى رەتتەلەدى. .
- كيىكتەردىڭ سانىن رەتتەۋ ماقساتىندا جۇرگىزىلەتىن شارالار «وحوتزووپروم» ءو ب» ر م ق ك- عا جۇكتەلەدى. بۇل مەملەكەتتىك مەكەمە كيىكتەردى اۋلاۋ جۇمىستارىن ۇيىمداستىرۋعا جانە جۇزەگە اسىرۋعا جاۋاپتى بولادى. اتالعان جۇمىستاردى «وحوتزووپروم» ءو ب» ر م ق ك وزدىگىنەن جۇرگىزۋمەن قاتار، ىنتالى جەكە نەمەسە زاڭدى تۇلعالار وكىلدەرىن تارتا وتىرىپ ورىندايدى، - دەپ اتالىپ وتكەن ۆەدومستۆو اقپاراتىندا.
ەسكە سالساق، جاقىندا ەكولوگيا جانە تابيعي رەسۋرستار ءمينيسترى ەرلان نىسانبايەۆ عالىمداردىڭ بيولوگيالىق نەگىزدەمەسى اياسىندا قازاقستاندا كيىكتەردىڭ 20 پايىزى رەتتەۋگە جاتاتىنىن ايتتى.
بۇدان بۇرىن حابارلانعانداي، مينيستر ماۋسىم ايىنىڭ باسىندا عالىمدار كيىك سانىن رەتتەۋ تۋرالى بيولوگيالىق نەگىزدەمەنى قاشان ازىرلەيتىنىن ايتقان ەدى.
ەگەر كيىكتى اۋلاۋعا رۇقسات بەرىلسە، بۇل ءىس-شارالار كۇزدە باستالادى.
